घरबाटै न्यायको ढोका: वैदेशिक रोजगारीका नाममा हुने ठगी रोक्न अत्याधुनिक अनलाइन उजुरी प्रणाली शुरु

वैदेशिक रोजगारीका नाममा हुने ठगीबाट पीडित श्रमिकहरूलाई घरदैलोमै न्याय दिलाउने उद्देश्यले सरकारले प्रविधिमैत्री अनलाइन उजुरी प्रणाली सञ्चालनमा ल्याएको छ । युवा, श्रम तथा रोजगारमन्त्री रामजी यादवले ताहाचलस्थित वैदेशिक रोजगार विभागमा मंगलवार आयोजित एक विशेष कार्यक्रममा ‘उजुरी डोफे गभर्मेण्ट नेपाल’ नामक अत्याधुनिक डिजिटल पोर्टलको औपचारिक शुभारम्भ गर्नुभएको हो ।

विगतमा वैदेशिक रोजगारीको प्रलोभनमा परी बढी रकम असुली वा अवैध रूपमा विदेश पठाउने गिरोहबाट ठगिएका पीडितहरू उजुरी दिन भौतिक रूपमै काठमाडौं धाउनुपर्ने बाध्यता थियो । विभागमा सीमित जनशक्तिका कारण प्रक्रिया ढिलो हुँदा पीडितहरूले काठमाडौंमा बस्न र खान थप आर्थिक भार व्यहोर्नुपर्ने अवस्था रहेकाले यो डिजिटल प्रणाली सुरु गरिएको हो ।

अब पीडितहरूले आफ्नै मोबाइल वा कम्प्युटरबाट आवश्यक प्रमाणहरू संकलन गरी अनलाइन माध्यमबाटै उजुरी दर्ता गराउन सक्नेछन् । उजुरी दर्ता हुनासाथ पीडितको मोबाइलमा म्यासेज र इमेलमार्फत विशेष ‘ट्रयाकिङ कोड’ प्राप्त हुनेछ, जसको सहायताले उनीहरूले आफ्नो फाइलको प्रगति र अवस्थाबारे घरबाटै जुनसुकै समयमा जानकारी लिन सक्ने व्यवस्था मिलाइएको छ ।

विभागले नेपाल प्रहरीसँग ‘एपीआई इन्टिग्रेसन’ गरी पक्राउ पुर्जी सिधै प्रहरीको केन्द्रीय प्रणालीमा प्रविष्ट हुने व्यवस्था मिलाएकाले अब अपराधीहरू तत्कालै कानुनी घेरामा आउने  ।

नयाँ डिजिटल प्रणालीका कारण ठगीमा संलग्न व्यक्तिहरूले प्रहरी चारित्रिक प्रमाणपत्र समेत प्राप्त गर्न नसक्ने हुँदा उनीहरूलाई कानुनी कारबाहीबाट उम्किन असम्भव हुनेछ । न्यायको ढोकालाई नागरिकको हातसम्म पुर्‍याउने यो सरकारी प्रयासले वैदेशिक रोजगार क्षेत्रमा व्याप्त विकृति र बिचौलियाको जालो तोड्न तथा पीडित श्रमिकलाई छिटो न्याय दिलाउन कोशेढुङ्गा सावित हुने विश्वास गरिएको छ ।