तेह्रथुमका छ वटै स्थानीय तहमा पुनःस्थापना अभियान: अपाङ्गता भएका व्यक्तिको स्वास्थ्य र शिक्षामा पहुँच विस्तार

तेह्रथुम जिल्लामा अपाङ्गता भएका नागरिकलाई समावेशी समाजमा समान सहभागिता सुनिश्चित गर्ने उद्देश्यले प्रदेश तथा स्थानीय सरकारको साझेदारीमा सञ्चालित ‘अपाङ्गता रोकथाम तथा पुनःस्थापना कार्यक्रम’ मार्फत अपाङ्गता भएका नागरिकको अभिलेखीकरण, परिचयपत्र वितरण तथा पुनःस्थापना सेवा विस्तार गरिएको छ। समावेशी समाज निर्माणका लागि चालिएका यी प्रयासहरूले दुर्गम क्षेत्रका अपाङ्गता भएका व्यक्तिहरूको स्वास्थ्य, शिक्षा र सामाजिक अधिकारमा पहुँच सहज बन्दै गएको छ।

स्थानीय तहमार्फत सञ्चालित बहुआयामिक अभियानअन्तर्गत हालसम्म तेह्रथुमका छ वटै स्थानीय तहमा रहेका एक हजार ७९३ जना अपाङ्गता भएका व्यक्तिको विस्तृत अभिलेख तयार पारिएको छ। अभिलेखीकरणसँगै लक्षित वर्गसम्म सरकारी सुविधा पुर्‍याउन एक हजार ७६३ जनालाई औपचारिक रूपमा अपाङ्गता परिचयपत्र समेत वितरण गरिसकिएको छ।

यस अभियानलाई प्रभावकारी बनाउन सामाजिक संस्था करुणा फाउन्डेसन र स्थानीय प्रशासनले संयुक्त रूपमा विभिन्न सेवाहरू प्रदान गर्दै आएका छन्। यसअन्तर्गत महिला स्वास्थ्य स्वयंसेविकाहरूको परिचालन, सहायक सामग्री वितरण, मानसिक स्वास्थ्य परामर्श, विशेष स्वास्थ्य शिविर तथा अल्पकालीन सीपमूलक तालिमहरू निरन्तर सञ्चालन भइरहेका छन्।

प्रदेश सरकार, स्थानीय तह र फाउन्डेसनको त्रिपक्षीय समन्वयमा आर्थिक वर्ष २०८१/८२ देखि जिल्लाभर सुरु गरिएको यो कार्यक्रममा हालसम्म कुल एक करोड ७४ लाख ११ हजार रुपैयाँ बजेट परिचालन भइसकेको छ। कार्यक्रम संयोजक केदार भण्डारीका अनुसार विनियोजित रकमको प्रत्यक्ष उपयोगमार्फत दुर्गम गाउँसम्मै पुनःस्थापना सेवा पुर्‍याइएको छ।