दशैँका लागि अग्रिम टिकट बुकिङ आजदेखि खुल्ने

काठमाडौँ । दशैँ मनाउन काठमाडौंबाट घर जाने यात्रुहरुलाई लक्षित गरी आज मंगलबारदेखि अग्रिम टिकट बुकिङ खुला हुने भएको छ । दशैं मनाउन देशका विभिन्न भागमा जाने यात्रुका लागि टिकट आजदेखि खुल्ने भएको हो ।

भदौ ३१ मा यातायात व्यवस्था विभाग र यातायात व्यवसायीबीच बसेको बैठकले असोज ५ देखि खुल्ला गर्ने निर्णय गरेको थियो । तर, पेट्रोलियम पदार्थको मूल्यवृद्धि गरिएको भन्दै यातायात व्यवसायीले टिकट बुकिङ खुल्ला गर्न मानेका थिएनन् ।

नेपाल यातायात व्यवसायी राष्ट्रिय महासङ्घको हिजो सोमबार बसेको बैठकले सरकारले सवारी साधनको भाडा १० प्रतिशत बढाउने निर्णय गरेको भन्दै टिकट बुकिङ खुल्ला गर्ने निर्णय गरेको हो ।

महासङ्घका महासचिव पुन्यप्रसाद सिटौलाले पेट्रोलियम पदार्थमा भएको मूल्यवृद्धिअनुरुप सार्वजनिक यातायातको भाडा दर समायोजन भएपछि भोलिदेखि टिकट बुकिङ खुलाउने निर्णय गरेको जानकारी गराएका छन् ।

काठमाडौंका विभिन्न स्थानमा सधैंका वर्षजस्तै लामो दूरीका सवारी साधनलार्य टिकत बुकिङ खुला गरिएको हो ।