दिलबहादुर घर्ती बचाउन मलेसियाबाट १ लाख सहयोग

काठमाडौं, २९ असार । ब्लडमनी तिर्न नसकेर साउदी अरबको जेलमा रहेका रोल्पाका दिलबहादुर घर्तीमगरलाई मृत्यदण्डबाट बचाउन मलेसियाबाट १ लाख रकम संकलन भएको छ । रोल्पा घर भई मलेसियामा रहेका पृथ्वीप्रसाद रानामगरको पहलमा संकलित १ लाख ४ सय ५५ रुपैयाँ “दिलबहादुर घर्ती बचाउनको लागि ब्लडमनी संकलन अभियान–२०७५” मूल समितिलाई हस्तान्तरण समेत गरिएको छ ।

“दिलबहादुरको जीवन रक्षाका लागि हामीले सहयोग अभियान जारी राखेका छौँ । यसैक्रममा मलेसियाबाट थप १ लाख रकम अभियान मूल समितिलाई प्राप्त भएको छ,” अभियान मूल समितिका संयोजक दीपेश पुनले भने, “म आर्थिक सहयोग गर्ने सबै सबै साथीहरुलाई समितिको तर्फबाट धन्यवाद दिन चाहन्छु ।” मलेसियाबाट यसअघि पनि ३ लाख भन्दा बढी रकम मूल समितिलाई हस्तान्तरण भइसकेको छ ।

संयोजक पुनले दिलबहादुरको जीवन रक्षाका लागि ओमनबाट हेमराज चलाउनेको पहलमा १८ हजार ४ सय ४१, कतारबाट कविराम बानियाँको पहलमा १२ हजार ७ सय १५ रुपैया, दुबईमा रहेका कमल महरले ३१ हजार २ सय ५६, जोर्डनमा रहेका गोविन्द पुनले १५ हजार १८, साउदीमा रहेका गणेश रोका र प्रशान्त रोकाले १० हजार ९ सय ९८, दलप्रसाद विकले १६ हजार ८ सय ११ रुपैया मूल समितिमा आइपुगेको जानकारी दिए ।