भरतपुर महानगरपालिकाको मुद्दा हेर्दाहेर्दैमा, सोमबार सुनुवाई हुने

काठमाडौं, असार २३ – भरतपुर महानगरपालिकाको वडा नम्बर १९ मा पुन मतगणनाका विषयमा सर्वोच्च अदालतमा आउँदो सोमबार मात्र सुनुवाई हुँदैछ ।

न्यायाधीशहरु मीरा खड्का र अनिलकुमार सिन्हाको इजलासमा यो मुद्दाको पेशी तोकिएको भए पनि हेर्न नभ्याईएको सर्वोच्च अदालतले जनाएको छ ।  निर्वाचन कार्यालयले च्यातिएका मतपत्र सहितका कागजात सर्वोच्चमा बुझाइसकेको छ ।

भतरपुर महानगरपालिकामा मतगणनाका क्रममा नेकपा माओवादीका प्रतिनिधिले जेठ १४ गते राती मतपत्र च्यातेपछि निर्वाचन आयोगले १९ नम्बर वडामा पुन मतदान गर्ने निर्णय गरेको थियो ।  तर आयोगको त्यो निर्णयविरुद्ध भरतपुर १९ का वडा सदस्य उम्मेदवार गुञ्जमान विक र भरतपुर १९ कै मतदातासमेत रहेका अधिवक्ता तुलसीराम पाण्डेले अदालतमा रिट दायर गर्नुभएको थियो ।

यो वडाको २८६८ मत मध्ये १८ सय मत गनेर नतिजा सर्वाजनिक गर्दासम्म भरतपुर महानगरपालिकाको मेयरमा प्रचण्डकी छोरी रेणु दाहाल, नेकपा एमालेका उम्मेदवार देवी ज्ञवालीभन्दा ७ सय ३३ मतले अघि हुनुहुन्थ्यो ।  थप ४ सय मत गणना भएको र त्यसको नतिजा सार्वजनिक हुनुअघि नै माओवादीका प्रतिनिधले मतपत्र च्यातेका थिए । १९ नम्बर वडापछि २० नम्बर वडाको मात्र मतगणना गर्न बाँकी थियो ।