सेप्टेम्बरमा भित्रिए ८८ हजार विदेशी पर्यटक, गत वर्षको तुलनामा सुधार
सारांश
- नेपाली पर्यटन क्षेत्रमा उत्साह थप्दै सन् २०२६ को सेप्टेम्बर महिनामा ८८ हजार २४८ जना विदेशी पर्यटक नेपाल भित्रिएका छन्।
- शरद ऋतुको सुरुआतसँगै पर्यटकीय मौसम सुरु भएकाले विभिन्न महादेशबाट पर्यटकहरूको आगमन बढेको नेपाल पर्यटन बोर्डले सार्वजनिक गरेको तथ्याङ्कले देखाउँछ।
- नेपाल पर्यटन बोर्डका अनुसार यस अवधिमा सबैभन्दा बढी दक्षिण एसियाली छिमेकी मुलुकहरूबाट ३० हजार ८५ जना पर्यटक आएका छन्।
नेपाली पर्यटन क्षेत्रमा उत्साह थप्दै सन् २०२६ को सेप्टेम्बर महिनामा ८८ हजार २४८ जना विदेशी पर्यटक नेपाल भित्रिएका छन्। शरद ऋतुको सुरुआतसँगै पर्यटकीय मौसम सुरु भएकाले विभिन्न महादेशबाट पर्यटकहरूको आगमन बढेको नेपाल पर्यटन बोर्डले सार्वजनिक गरेको तथ्याङ्कले देखाउँछ।
नेपाल पर्यटन बोर्डका अनुसार यस अवधिमा सबैभन्दा बढी दक्षिण एसियाली छिमेकी मुलुकहरूबाट ३० हजार ८५ जना पर्यटक आएका छन्। कुल आगमनमा भारतबाट सर्वाधिक १७ हजार ४२५ जना पर्यटक भित्रिएका हुन्। यसैगरी श्रीलङ्काबाट सात हजारभन्दा बढी र बङ्गलादेशबाट करिब चार हजार पर्यटक नेपाल भ्रमणमा आएका छन्।
एसियाका अन्य मुलुकहरूबाट पनि उल्लेख्य सङ्ख्यामा पर्यटक नेपाल ओर्लिएका छन्। चीनबाट ११ हजार २१२ जना पर्यटक आउँदा जापान, दक्षिण कोरिया, थाइल्यान्ड र भियतनामजस्ता मुलुकबाट समेत नेपाल भ्रमण गर्नेहरूको सङ्ख्या राम्रो रहेको छ। एसियाली बजारबाहेक युरोप, अमेरिका र ओसिएनिया क्षेत्रका नागरिकको रोजाइमा पनि नेपाल परेको छ।
गत वर्षको सोही महिनाको तुलनामा यस वर्ष पर्यटक आगमनमा सुधार देखिएको छ। सन् २०२५ को सेप्टेम्बरमा ७८ हजार ७११ विदेशी पर्यटक आएकोमा यस वर्ष सो सङ्ख्या वृद्धि भएको हो। प्राकृतिक सौन्दर्य र सांस्कृतिक सम्पदाको अवलोकनका लागि विभिन्न महादेशका नागरिक नेपालतर्फ आकर्षित भइरहेका छन्।
पर्यटकको सङ्ख्या बढे पनि प्राकृतिक विपत्तिका कारण सोचेअनुरूप भने आगमन हुन नसकेको बोर्डको विश्लेषण छ। गत भदौ १० गते रसुवास्थित भोटेकोशी नदीमा आएको विनाशकारी बाढीका कारण मुख्य सडकमार्ग क्षति पुगेपछि पर्यटक आगमनमा केही असर परेको छ। पूर्वाधार सुधार र प्राकृतिक विपत्को चुनौती सामना गर्दै पर्यटन क्षेत्र लयमा फर्किने अपेक्षा गरिएको छ।
कुल कमेन्ट:
0
Asmita Ramtel
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया