यसरी सुरु भएको थियो अनुष्का शर्मा र बिराट कोहलीको प्रेम सम्बन्ध

बलिउड अभिनेत्री अनुष्का शर्मा र क्रिकेटर बिराट कोहलीको विवाहको चर्चा अहिले पनि बलिउड फिल्म उद्योगमा हट इस्यु बनिरहेकै छ । गत सोमबार यी दुईले आफ्नो प्रेम सम्बन्धलाई वैवाहिक सम्बन्धमा परिणत गरेका हुन् । यी दुई रिलेसनशिपमा रहेदेखि नै सञ्चारमाध्यमा छाउँदै आएका थिए । तर पछिल्लो समय उनीहरुको ब्रेकअप भएको समेत अनुमान गरिएको थियो । तर यी सबै खाले अनुमानलाई गलत सिद्ध गर्दै उनीहरुले इटलीको पर्यटकीय शहर मिलानमा विवाह गरे । र, अन्ततः प्रेमीप्रेमिकाबाट श्रीमान श्रीमतीमा परिणत भए ।

प्रेमको सुरुवात २०१३ !
अनुष्का र बिराटको प्रेम कहानी सन् २०१३ बाट सुरु भएको थियो । एउटा प्रोडक्टको विज्ञापनको क्रममा बिराट र अनुष्काको भेट भएको थियो । विज्ञापनको सुटिङताका नै गहिरो दोस्ती सुरु भए पछि उनीहरुको भेटघाट बाक्लियो । यसरी बाक्लिएको भेटघाटकै आधारमा उनीहरु गहिरो रिलेसनमा रहेको अड्कल गरिन थालिएको थियो । जब २०१४ मा दक्षिण अफ्रिकामा क्रिकेट खेलेर फर्किएका बिराटलाई लिन मुम्बई एयरपोर्टमा अनुष्काले कार पठाइन् । र, एयरपोर्टबाट अनुष्काले पठाएको कारमा बिराट सिधै अनुष्काको घर गए । जबकी टिम इण्डियालाई आरामका लागि मुम्बईमै होटलको व्यवस्था गरिएको थियो । यो घटनापछि भने उनीहरु बीच प्रेम सम्बन्ध रहेको स्पष्ट भयो ।

त्यसयता बिराट र अनुष्का पटक पटक सार्वजनिक स्थानमा एकसाथ देखिन थाले । खेलको क्रममा न्यूजिल्याण्ड पुगेका बिराटलाई भेट्न अनुष्का त्यही पुगिन् । यता पिकेको सुटिङ भइरहेको समय अनुष्काको २६औँ जन्मदिन सेलिब्रेसन गर्न बिराट पनि सुटिङस्थल नै पुगे । यति भइसके पछि भने उनीहरु सञ्चारकर्मी तथा बलिउड फिल्म र भारतीय क्रिकेट पारखीबीच हट इस्यु बने । सञ्चारकर्मीले सम्बन्धको बारेमा सोधेका प्रश्नमा बिराटले अस्वीकार गरेनन् । तर २०१६ मा भने उनीहरुको सम्बन्धमा दरार आएको गसिप बाहिरियो । एक म्यागेजिनका लागि अनुष्काले खिचाएको ग्ल्यामर्स तस्विरका कारण बिराट रिसाएको र सम्बन्ध टुक्रिएको अनुमान गरियो । तर लगत्तै दुवै फेरी सँगसँगै केही कार्यक्रमका साथै न्यूयोर्कमा छुट्टि मनाइरहेको अवस्थामा देखिए पछि भने यो अनुमान पनि गलत सावित भयो ।