​प्रदूषण जाँच्ने मेशिन बोकेर मन्त्री सडकमा निस्किए पछि…

काठमाडौं, २० जेठ । आईतबार दुई मन्त्रीले सवारी प्रदुषण जाँच गर्ने मेशिन बोकेर सडकमा निस्किएका छन् ।

यातायात व्यवस्था विभाग अन्तर्गतको प्रदुषण मापनकेन्द्रको लापरवाहीका कारण प्रदुषित धुवा फ्याक्ने सवारी साधनहरुमा हरियो स्टीकर टाँसेको फेला परेपछि आईतबार दुई मन्त्री सवारी प्रदुषण जाँच गर्ने मेशिन बोकेर सडकमा निस्किएका हुन ।

गृहमन्त्री राम बहादुर थापा बादल तथा वन तथा वातारण मन्त्री शक्ति बहादुर बस्नेत सवारी साधनले फ्याकेको धुवामा प्रदुषणको मात्रा जाँच गर्ने मेशिन बोकेर सडकमा निस्किएका हुन् । सरकारले सवारी साधनबाट हुने प्रदूषण मापन तथा नियमनमा कडाइ गर्ने उद्देश्यले गृहमन्त्री राम बहादुर थापा बादल र वन तथा वातावरण मन्त्री शक्ति बहादुर बस्नेतको सडकमा निस्किएको गृहमन्त्रीका प्रेस सल्लाहकार किरण भट्टराईले बताए । उनले भने, ‘यो सुरुवात मात्रै हो, दिनैभरि चेकजाँच भइरहेको छ।’

दुई मन्त्री गाउन र मास्क लगाएर सडकमा प्रदुषण जाँच गर्न निस्किएपछि सर्वसधारण रमाइलो मान्दै हेरिरहेका थिए भने सवारी साधनहरु भने प्रदुषण फेल हुने डरले त्रसित बनेका थिए ।

काठमाडौंको हावामा सावरी साधनबाट फ्याकेको धुवाबाट हुने प्रदुषणको ३८ प्रतिशत रहेको विश्वास गरिएको छ । सावारी साधनले २ दशमलव ५ पिएम (पार्टिकुलर म्याटर) को धूलो उत्पादन गर्छन् । मानव स्वास्थ्यका दृष्टिले सम्वेदनशील सानो धूलोका कण निकाल्ने भएकोले सरकारले प्रदूषण मापनमा कडाइ गर्न लागेको हो ।