by अभियान पोष्ट
मुक्ति गैरे पुष ९, वुटवल । नेकपा पाल्पा इन्चार्ज पूर्णबहादुर सिंह र मगर मुक्ति मोर्चा नेपालका नेता मिनबहादुर आले रिहा भएका छन् । विहीबार उच्च अदालत बुटवलले नेताद्धय सिंह र आलेलाई रिहा गर्न आदेश दिएको हो । उनीहरुलाई प्रहरीले पटक पटक पक्राउ गरेपछि बन्दी प्रत्यक्षीकरणको रिट दायर गरिएको थियो । विहीबार उच्च अदालतको तर्फबाट न्यायधीसद्धय अग्निप्रसाद थपलिया र हरिप्रसाद पौडेलको फैसलाले नेताद्धय सिंह र आलेलाई रिहा गर्न आदेश दिएको हो । नेताद्धयको तर्फबाट अधिवक्ता ज्ञानु केसीले बहस गरेकी थिइन् । नेताद्धय सिंह र आलेलाई मंसिर ४ गते बुटवलबाट पक्राउ गरेको थियो । पक्राउ परेपछि प्रहरीले विस्फोटक मुद्धा दायर गरेको थियो । पक्राउ परेसँगै उनीहरुलाई मंसिर ३० गते जिल्ला अदालत भैरहवामा उपस्थित गराइएको थियो । अदालतमा माननीय न्यायधीस कमलप्रसाद ज्ञवालीको आदेशमा साधारण तारेखमा रिहा गर्ने फैसला सुनाइएपनि अदालतको फैसलालाई उलङ्घन गर्दै प्रहरीले अदालत परिसरभित्रैबाट गिरफ्तार गरेको थियो । त्यसपछि प्रहरीले पाल्पा लगेको थियो । पाल्पा अदालतले पुष १ गते न्यायधीश खड्क केसीले साधारण तारिखमा रिहा गर्न आदेश दिएपछि रिहा भएको सिंह र आलेलाई पुनः पक्राउ गरी गुल्मी लगेको थियो । गुल्मी नेताद्धय सिंह र आलेलाई अभद्र व्यवहारको मुद्दा चलाएको थियो । नेताद्धय सिंह र आलेलाई गिरफ्तारी विरुद्ध नेकपा केन्द्रीय सदस्य एवं लुम्बिनी ब्युरो इन्चार्ज भीमले तत्काल रिहाई नगरे दलाल राज्यसत्ता र त्यसको गृहप्रशासन विरुद्ध सम्झौताहिन संघर्ष गर्ने बताएका थिए । नेता सिंह र आलेको गिरफ्तार गैरन्यायिक भएको भन्दै देशभर सर्वत्र विरोध समेत भएको थियो । नेता सिंह प्रखर युवा नेता, अखिल (क्रान्तिकारी)का पूर्व केन्द्रीय अध्यक्ष एवं नेकपा लुम्बिनी ब्युरो सदस्य समेत हुन् । सिंहका राजनीति र शिक्षासँग सम्बन्धित विभिन्न पुस्तकहरु समेत प्रकाशित हुनुका साथै विभिन्न पत्रपत्रिकाहरुमा राजनीतिक वैचारिक लेखहरु समेत निरन्तर प्रकाशित हुँदै आएका छन् । उनि जनशिक्षा मासिक पत्रिकाका प्रधान सम्पादक तथा प्रकाशक पनि हुन् साथै नेपाल पत्रकार महासंघका सदस्य पनि हुन् ।
