भोटेकोसीको बाढी त्रिशूलीतर्फ: राजमार्ग र तटीय बस्तीमा उच्च सतर्कता अपनाउन महाशाखाको आग्रह
सारांश
- रसुवाको उपल्लो क्षेत्रमा अचानक उर्लिएको भोटेकोसी नदीको बाढी तलतिर सर्दै जाँदा पृथ्वी राजमार्ग र मुग्लिन-नारायणगढ सडकखण्ड आसपासका नदी तटीय बस्तीमा ठूलो जोखिम सिर्जना भएको छ।
- पहाडी भेगमा आएको बाढीले गल्छी क्षेत्र भएर धादिङ र गोरखाको सिमाना आसपासका क्षेत्रमा कटान तथा डुबानको जोखिम बढेपछि तटीयबासी यतिबेला उच्च जोखिममा परेका हुन्।
- जल तथा मौसम विज्ञान विभाग अन्तर्गतको बाढी पूर्वानुमान महाशाखाले भदौ १० गते बिहान १०:२८ बजे आपत्कालीन सूचना जारी गर्दै उक्त बाढी गल्छी पुगिसकेको र केही घण्टामै मुग्लिन क्षेत्र नाघ्ने सम्भावना सार्वजनिक गरेको छ।
रसुवाको उपल्लो क्षेत्रमा अचानक उर्लिएको भोटेकोसी नदीको बाढी तलतिर सर्दै जाँदा पृथ्वी राजमार्ग र मुग्लिन-नारायणगढ सडकखण्ड आसपासका नदी तटीय बस्तीमा ठूलो जोखिम सिर्जना भएको छ। पहाडी भेगमा आएको बाढीले गल्छी क्षेत्र भएर धादिङ र गोरखाको सिमाना आसपासका क्षेत्रमा कटान तथा डुबानको जोखिम बढेपछि तटीयबासी यतिबेला उच्च जोखिममा परेका हुन्।
जल तथा मौसम विज्ञान विभाग अन्तर्गतको बाढी पूर्वानुमान महाशाखाले भदौ १० गते बिहान १०:२८ बजे आपत्कालीन सूचना जारी गर्दै उक्त बाढी गल्छी पुगिसकेको र केही घण्टामै मुग्लिन क्षेत्र नाघ्ने सम्भावना सार्वजनिक गरेको छ। उत्तरबाट तीव्र गतिमा बगेर आएको यो विशाल जलप्रवाह त्रिशूली नदीमा मिसिँदा तल्लो तटीय क्षेत्रमा बहाव एकाएक बढेको हो।
मुख्य राजमार्ग आसपासका व्यस्त बजार, बस्ती र नदी किनारका खेतीयोग्य जमीन डुबानमा पर्ने उच्च जोखिम देखिएकाले स्थानीय नागरिकहरू सुरक्षित स्थानतर्फ सर्न थालेका छन्। बाढीको तीव्र गति र सम्भावित क्षति घटाउन पूर्वतयारीस्वरूप महाशाखाले नदी आसपासका क्षेत्रमा आवतजावत रोक्न र सतर्कता बढाउन कडा आह्वान गरेको छ।
नदी किनारका जोखिमपूर्ण स्थानमा बसोबास गर्ने सर्वसाधारणलाई सुरक्षित स्थानमा स्थानान्तरण हुन र स्थानीय प्रशासन तथा सुरक्षा निकायले दिएका निर्देशनहरू अनिवार्य रूपमा पालना गर्न आग्रह गरिएको छ।
बाढीको बहाव अझै तलतिर बढ्ने क्रम जारी रहेकाले चितवन र नवलपुर क्षेत्रका नदी किनारका बासिन्दालाई समेत आगामी केही घण्टा विशेष पूर्वसावधानी अपनाउन सुरक्षा निकायले निर्देशन दिएका छन्। जोखिमपूर्ण मानिएका क्षेत्रमा सुरक्षाकर्मी परिचालन गरी स्थानीयलाई सुरक्षित ठाउँमा राख्ने काम भइरहेको छ।
कुल कमेन्ट:
0
Asmita Ramtel
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया