अँध्यारोमा कसैले तरवार नचलाऊँ : सञ्चारमन्त्री बास्कोटा

बुटवल । सञ्चार तथा सूचना प्रविधि मन्त्री गोकुल बास्कोटाले अँध्यारोमा कसैले पनि तरबार नचलाउन आग्रह गरेका छन् । उनले बुटवलमा पत्रकारसँग कुरा गर्दै अफवाहहरुको आयु छोटो हुने र सत्य छिट्टै बाहिर आउने दाबी गरे ।

मन्त्री बास्कोटा सार्वजनिक कार्यक्रममा खरो शैलीमा प्रस्तुत हुने गर्छन् । लोकतन्त्रमा सत्तापक्ष र प्रतिपक्षबीचको विवाद र बहस हुनु स्वाभाविक भएको, लोकतान्त्रिक आन्दोलनका सहयात्री दल नै आपसमा लोकतन्त्र पक्षधर र विपक्षीको आरोप प्रत्यारोपमा उत्रिन थालेको बताए ।

बुटवल पुगेका मन्त्री बास्कोटाले लोकतन्त्रविरोधी भनिनु कतैबाट पनि पुष्टि हुन नसक्ने ठोकुवा गरे । मन्त्री बास्कोटाले कम्युनिष्ट नभएको भए देशमा संघीय लोकतान्त्रिक गणतन्त्र आउन सम्भव नभएको बताएका थिए ।

चुनावसम्म धैर्य गर्न कांग्रेसलाई सुझाव दिंदै २०४६ सालमा मदन भण्डारी र गणेशमान सिंहको सहकार्यका कारण र २०६२।०६३ सालको परिवर्तन कांग्रेस एक्लैले नभई कम्युनिस्टको साथका कारण आएको स्पष्ट गरे ।

२०१५ सालमा दुई तिहाइ ल्याएका बिपी कोइरालालाई पनि बदनाम गराएर लोकतन्त्रको हरण गराइएको बताउँदै अहिलेको सरकारलाई बदनाम र असफल बनाएर कांग्रस प्रतिगमनमा जान चाहेको हो? भन्दै प्रतिप्रश्न गरे ।