इटहरी उपमहानगर : मेयरमा ६ भोट, उपमेयरमा शून्य पनि, कांग्रेस एमालेबाहेक सबैको जमानत जफत

इटहरी, असार २३ – इटहरी उपमहानगरपालिकामा शुक्रबार मतगणना सकिएको छ । मेयरमा १५ जनाले उम्मेदवार थिए जसमा कांग्रेस र एमालेको बाहेक सबै उम्मेदवारको जमानत जफत भएको छ ।

एमालेले मेयर उपमेयर दुवै पद जितेको छ । एमालेका मेयरका प्रत्यासी द्वारीकलाल चौधरीले २२ हजार ६ सय ८९ मत ल्याउँदै विजयी हुनुभएको छ ।

यसैगरी उपमेयरमा लक्ष्मी गौतम २१ हजार ८ सय ४२ मत ल्याउँदै  विजयी हुनु भयो । मेयरमा नेपाली कांग्रेसका प्रत्यासी रोहित प्रसाईले १९ हजार ९ सय ८५ मत ल्याउनु भयो । उपमेयरमा नेपाली कांग्रेसका बिमला शिवाकोटी ढकालले १८ हजार ३ सय ५२ मत प्राप्त गर्नु भएको छ ।

ती मध्ये माओवादी केन्द्रका हरीमाया जिमीले ३ हजार ६ सय ६४ मत प्राप्त गर्नु भएको छ । माओवादी केन्द्रका उपमेयरका प्रत्यासी भिम सुवेदीले ४ हजार १ सय ३१ मत प्राप्त गर्नु भएको छ ।

इटहरीमा कांग्रेस र एमाले बाहेक अन्य दलका उम्मेदवारको जमानत जफत भएको इटहरीका निर्वाचन अधिकृत भरतमणी रिजालले जानकारी दिनु भयो । बिहान भएको पत्रकार सम्मेलनमा इटहरीमा राप्रपाका मेयरका प्रत्यासी रोहित बहादुर कार्कीले ३ हजार ७ सय १५ मत र उपमेयरका प्रत्यासी माया रायमाझीले ३ हजार ९ सय १९ मत प्राप्त गरेको जानकारी दिइएको छ ।

मेयरमा सबैभन्दा कम मत स्वतन्त्र उम्मेदवार वीरबहादुर काफ्लेले ६ मत ल्याउनु भएको छ भने उपमेयरमा सबैभन्दा कम मत रुझा घिमिरेको शून्य मत रहेको छ । रुझा घिमिरे चुरे भावर पार्टीबाट इटहरीको उपमेयरमा उम्मेदवार बन्नु भएको थियो ।

यसैगरी इटहरी उपमहानगरको मेयरमा स्वतन्त्र उम्मेदवार बन्नु भएका पन्नालाल चौधरीले २२ मत ल्याउनु भएको छ । यस्तै रामप्रसाद रेग्मीले ८ मत ल्याउनु भएको छ । इटहरीकै मेयरका प्रत्यासी खम्बुवान राष्ट्रिय मुक्ति मोर्चाका उम्मेदवारले ८५ मत ल्याउनु भएको छ । इटहरीमा माओवादी केन्द्रले एउटा वडा सदस्य मात्रै जितेको छ ।

एमालले इटहरीमा ८ वटा वडामा वडाअध्यक्ष जितेको छ भने नेपाली कांग्रेसले ११ वटा वडा अध्यक्ष जितेको छ । एउटा भने नेपाल लोकतान्त्रिक फोरमले जितेको छ । वडा नम्बर १० मा नेपाल लोकतान्त्रिक फोरमका प्रकाश चौधरी विजयी हुनु भयो । इटहरीमा ५७ हजार ४ सय ७६ मत खसेको थियो । इटहरी उपमहानगरमा  ७७ हजार ६ सय ९७ मत खसेको जिल्ला निर्वाचन कार्यालय सुनसरीले जनाएको छ ।