जनमत गुमाइसकेको सरकार देशलाई अनिर्णयको बन्दी बनाउने प्रयासमा : ओली

काठमाडौं, १६ पुस । नेपाल कम्युनिष्ट पार्टी (एमाले)का अध्यक्ष केपी शर्मा ओलीले प्रदेशसभा तथा प्रतिनिधिसभाको चुनावमा वाम गठबन्धनले स्पष्ट बहुमत ल्याए पनि जनमत गुमाइसकेको सरकारले सत्ता लम्ब्याउने र देशलाई अनिर्णयको बन्दी बनाइरहने प्रयासमा रहेको बताएका छन् । अंग्रेजी नयाँ वर्षको अवसर पारेर अध्यक्ष शर्मा ओलीले १ जनवरी २०१८ को मितिमा जारी गरेको विज्ञप्तिमा त्यस्तो आरोप लगाइएको छ ।

हेर्नुहोस् विज्ञप्तिको पूर्णपाठ :

अंग्रेजी नयाँ वर्ष २०१८ को अवसरमा स्वदेश तथा विदेशमा बस्नुभएका सम्पूर्ण नेपाली दाजुभाइ तथा दिदीबहिनीहरुमा उत्तरोत्तर प्रगति, सुस्वास्थ्य र दीर्घायूको हार्दिक शुभकामना व्यक्त गर्दछु ।

सन २०१७ लाई बिदा गरेर आजको बिहानीबाट हामी सन् २०१८ मा प्रवेश गरेका छौं । समयको आफ्नै चक्रअनुसार सम्बतहरु फेरिने क्रम जारी नै रहन्छ । तथापि कुनै वर्षहरु यति धेरै महत्वका हुन्छन्, जसले आम नेपालीको राजनीतिक, सामाजिक तथा व्यक्तिगत जीवनमा समेत अमिट छाप छाडेर जान्छन् । सन् २०१७ नेपालीका लागि त्यस्तै एउटा महत्वको वर्ष बनेर बिदा भएको छ ।

खासगरी संविधान कार्यान्वयनको मूल कडीको रुपमा रहेका स्थानीय तह, प्रदेशसभा र प्रतिनिधिसभाका निर्वाचन यसै वर्ष सम्पन्न भए, जसले लामो समयदेखि नेपाली राजनीतिमा जारी रहेको संक्रमणकाललाई मुलतः समाप्त पारेका छन् । यी निर्वाचनको सफलतासँगै नेपाली जनताले बर्षौदेखि प्रतीक्षा गरेको विकास र समृद्धिको सपना अब प्राप्ति हुने मार्गतिर हामी डोरिएका छौं ।

सन् २०१७ मा नेपालको न्यायपालिका र सुरक्षा क्षेत्रमा केही विसंगति भित्राउन असफल प्रयास पनि भए ।

नेपाल लामो समयसम्म अस्थिर राजनीतिको चपेटामा पर्यो । देशका सबै अवयवहरुमा प्रत्यक्ष–अप्रत्यक्षरुपमा यसको असर पर्यो, जसले गर्दा प्राकृतिक र मानव श्रोतसाधनमा सम्पन्न हुँदाहुँदै नेपाल पछाडि पर्यो ।

नेपालीहरु गरिब भए तर अब यो अवस्था लामो समयसम्म रहँदैन । देशलाई स्थिरता र विकासतर्फ लैजानकै लागि हामीले वामपन्थी गठबन्धन निर्माण गरेर चुनावमा होमियौं । जनताले हामीलाई स्थिरता र विकासको मार्गमा देशलाई अगाडि बढाउने विश्वाससहित स्पष्ट बहुमत पनि दिएका छन् ।

त्यस कारण अब निकट भविष्यमा बन्ने नयाँ सरकारले देशमा विकास र समृद्धिको महाअभियान सुरु गर्नेछ । त्यसकारण सन् २०१८ नेपालमा समृद्धि र विकासको महाअभियानको प्रारम्भ बर्ष हुने छ ।

निर्वाचन मार्फत वाम गठबन्धनले स्पष्ट बहुमत ल्याएपनि जनमत गुमाइसकेको वर्तमान सरकार अझै पनि सत्ता लम्ब्याउने र देशलाई अनिर्णयको बन्दी बनाइरहने प्रयासमा छ ।

देश विकास हुन नदिने केही स्वदेशी र विदेशी शक्तिहरुको इशारामा जनमतविरुद्ध जे जस्तो प्रयास भइरहेको छ, त्यो हामीलाई सह्य छैन । देश विकासको महाअभियानमा अवरोध नगर्न हामी सबैलाई आग्रह गर्दछौं ।

अन्त्यमा, नयाँ बर्ष २०१८ को पुनः हार्दिक शुभकामना व्यक्त गर्दछु ।

मिति : १ जनवरी २०१८

केपी शर्मा ओली
अध्यक्ष
नेकपा एमाले