देउवाको स्पष्टीकरण : ओलीसँग सम्झौता गरेको छैन्, अब सशक्त आन्दोलन सुरु

काठमाडौं, १ फागुन । प्रमुख प्रतिपक्षी दल नेपाली कांग्रेसका सभापति एवम् पूर्व प्रधानमन्त्री शेरबहादुर देउवाले आफूले नेकपाका अध्यक्ष तथा वर्तमान प्रधानमन्त्री केपी शर्मा ओलीसँग कुनै सम्झौता नगरेको स्पष्ट पारेका छन् । बुधबार बसेको पार्टी केन्द्रीय समिति बैठकमा सम्बोधन गर्दै सभापति देउवाले यस्तो स्पष्टीकरण दिएका हुन् ।

पछिल्लो समय उनीमाथि सरकारसँग सम्झौता गरेको आरोप लाग्ने गरेको छ । उनीमाथि विभिन्न नियुक्तीको लागि आफ्ना मान्छेलाई प्रधानमन्त्री ओलीसमक्ष सिफारिश गर्ने गरेको आरोप लागेको छ । हालै उनले अख्तियारको आयुक्तको लागि पनि प्रधानमन्त्री ओलीसँग बार्गे्निङ गरेको गाँईगुँई चलेको थियो । तर, उनले हिजोको केन्द्रिय कमिटी बैठकमा यी सबै आरोप र हल्लामा कुनै सत्यता नभएको जिकिर गरेका थिए ।

उनले सरकार गठन भएको दुई वर्ष पूरा भएको र यो बीचमा सरकारले देश र जनताको हितमा खासै काम गर्न नसकेको आरोप लगाउँदै सरकारविरुद्ध अब सशक्त आन्दोलन छेड्ने घोषणा गरेका छन् । उनले भने,‘अब सरकारविरुद्ध सशक्त रुपमा उत्रिनुपर्छ । अब सरकारले गरेका हरेक गलत कामको भण्डाफोर गर्नुपर्छ ।’