फुजेलमा महिलामाथि सांघातिक आक्रमण
सारांश
- गोरखा ।
- गण्डकी गाउँपालिका वडा नम्बर–३ फुजेल निवासी जिरादेवि दाहालमाथि सांघातिक आक्रमण भएको छ ।
- स्थानीय तुलाराम दाहालले महिलामाथि आक्रमण गरेका हुन् ।
गोरखा । गण्डकी गाउँपालिका वडा नम्बर–३ फुजेल निवासी जिरादेवि दाहालमाथि सांघातिक आक्रमण भएको छ । स्थानीय तुलाराम दाहालले महिलामाथि आक्रमण गरेका हुन् ।
आक्रमणमा परि दाहालको टाउकोमा गम्भीर चोट लागेको छ । स्थानीय स्वास्थ चौकीमा उपचार नहुने भएपछि घाइतेलाई थप उपचारको लागि काठमाडौंको अन्नपूर्ण न्यूरो अस्पताल लगिएको छ ।
दाहालको टाउकोमा १० वटा टाँका लगाइएको छ । घाइते दाहाल गाउँमा एकदम मिलनसार महिला पनि हुन् ।
कसरी भयो महिलामाथि आक्रमण ?
बिहानैदेखि रक्सीको नसामा गाउँ डुलिरहने तुलाराम दाहाल त्यो दिन पनि रक्सी खाएर हो–हल्ला गर्दै हिँडेका थिए । रक्सी खाएपछि मन नपरेको मान्छेलाई गाली गर्दै हिँड्ने उनको स्वभाव नै हो ।
आक्रमण भएको दिन तुलाराम दाहाल रक्सी खाइसकेपछि घर फर्कने क्रममा घाइते जिरादेवी दाहालको रामप्रसाद दाहाल (श्रीमान)सँग भेट भयो । पानीको विषयमा गफ सुरु भएको उनीहरुको विषयले अन्तिममा झगडाको रुप लियो । तुलाराम दाहालले ‘अब तलाईं मैले मार्न मात्र बाँकी छ’ भनेपछि चर्काकर्ची भएको हो ।
सामान्य चर्काचर्कीले विस्तारै ठूलो रुप लिँदै गएको फुजेल निवासी राजन पन्त बताउँछन् । हात हालाहालको अवस्थामा पुगेपछि जिरादेवी दाहाल छुट्याउन पुगिन् ।
तर, महिलाको त्यहाँ के लाग्थ्यो र ? भुँइमा फालेको काठको मुढा टिपेर तुलारामले जीवरादेवीलाई हाने । जीरादेवी एकैपटकमा भुँइमा लडिन् । तर, भुँइमा लडेपछि पनि तुलारामले उनलाई मुढाले हिर्काउन भने छोडेनन् ।
महिलामाथि आक्रमणका घटना हुन थालेपछि फुजेलका स्थानीय त्रसित हुन थालेका छन् । फुजेलका स्थानीयहरु भन्छन्, ‘महिलालाई यसरी दिउँसै रक्सी खाएर कुट्न सक्नेले पछि हामीलाई एक्लै भेट्यो भने बाँकी राख्छ ?’
आक्रमण गर्ने दाहाल नेपाली कांग्रेसका स्थानीय नेता हुन् । दाहाल पहिला पनि फुजेलमा विभिन्न काण्ड मच्चाउँदै आएका व्यक्ति हुन् ।
भाग्ने क्रममा पक्राउ
घटना भएको २/३ घण्टापछि नेपाल प्रहरी उनको घरमा पुग्यो । घरमा पुगेपनि त्यो दिन उनलाई प्रहरीले समात्न सकेन् । सायद उनले पहिल्यै नै माथिको सोर्सफोर्स लगाइसकेका थिए ।
गाउँघरमा सबैले गाली गर्न थालेपछि तुलाराम दाहाल फरार हुने सोचमा थिए । घटना भएको दिन नै गाउँबाट राति भाग्ने तयारीमा रहेका दाहाल त्यो दिन भाग्न सकेनन् । तर, उनको सोचलाई प्रहरीले झ्वाम पारिदिएको छ ।
काठमाडौं आएर लुकेर बस्ने सोच बनाएका दाहाललाई बेनीघाट प्रहरीले पक्राउ गरेको छ । हाल उनी बेनीघाट प्रहरीको हिरासतमा छन् ।
उनी काठमाडौं जाने क्रममा बेनीघाटमा पक्राउ परेका हुन् । उनलाई प्रहरीले आजै जिल्ला प्रहरी कार्यालय, गोरखा पठाउने र अनुसन्धान थाल्ने बताइएको छ ।
प्रतिक्रिया