मध्यपुर थिमि– ६ मा काँग्रेस समूह विजयी

नगरकोट, ७ जेठ । भक्तपुरको मध्यपुरथिमि नगरपालिका– ६ मा नेपाली काँग्रेसको टोली विजयी भएको छ ।

काँग्रेसका इन्द्रबहादुर प्रजापतिले एक हजार २१० मत प्राप्त गरी विजयी हुनुभएको छ । उहाँका निकटतम प्रतिद्वन्द्वी नेकपा(माओवादी केन्द्र)का कृष्णमान प्रजापतिले ५५६ मत पाउनुभएको छ । वडा सदस्यमा महिला सदस्य अरुणा कारञ्जित र दलित महिला सदस्य सीता विश्वकर्मा तथा खुला सदस्यद्वयमा काँग्रेसका हरिदास प्रजापति र भजराम खड्का विजयी हुनुभएको छ ।

थिमिमा मतगणना जारी
प्रमुखका उम्मेदवार एमालेका मदनसुन्दर श्रेष्ठ नौ हजार ७९९ मतका साथ अग्रस्थानमा रहनुभएको छ । काँग्रेसका अष्टकुमार कवें सात हजार ९६४ मतका साथ दोस्रो स्थानमा रहनुभएको छ ।

त्यस्तै उपप्रमुखमा भने काँग्रेसकी अञ्जना मधिकर्मी आठ हजार ५० मत पाएर अग्रस्थानमा रहनुभएको छ । नेमकिपाका केदार खड्का भने पाँच हजार ३०२ मतका साथ दोस्रो स्थानमा रहनुभएको छ ।