जनकपुर । त्रेता युगमा सीता र रामले रङ र अबिर दलेर होली खेलेको स्मरणमा आइतबार मिथिला माध्यमिकी परिक्रमामा सहभागीहरुले होली खेलेका छन् ।
परिक्रमामा मिथिला विहारीको डोलासँगै परिक्रमामा कञ्चनवन पुगेका सहभागीहरुले एक अर्कालाई रङ र अबिर दलेर होेली पर्वको शुभारम्भ गरेका हुन् ।
कञ्चनवनमा परिक्रमामा सहभागीहरुले अबिर खेलेपछि मिथिलाञ्चलमा होली पर्वको आगमन भएको मानिन्छ । परिक्रमा डोला कञ्चनवन पुगेपछि होली खेल्ने परम्परा छ ।
यहाँको होली मिथिलाञ्चलका अधिकांश मठ मन्दिरका महन्थ, सामाजिक, सांस्कृतिक र राजनीतिक क्षेत्रमा आबद्ध व्यक्तिहरुको सहभागिता हुन्छ ।
फागुन शुक्ल प्रतिपदाबाट शुरु हुने मिथिला मध्येमा परिक्रमा फागुन शुक्ल सप्तमीमा मिथिला विहारीको डोलासँगै ध्रुवकुण्डबाट कञ्चनवन पुग्ने गर्छ । यहाँ इच्छावती गंगा र वीरजा गङ्गाको संगमस्थल हो ।
इच्छावती नदीले भगवान रामलाई होली उत्सव मनाउन सहयोग गरेको जनविश्वास रहेको पाइन्छ । यो स्थानमा भगवान राम र माता जानकीले होली पर्व मनाएका थिए ।
यहाँ परिक्रमामा सहभागीहरु रङ र अबिर दलेर होली खेल्ने गर्छन । कञ्चन वनको होलीको प्राचिनतालाई देखेर विगत केही वर्षदेखि बृहत्तर जनकपुर क्षेत्र विकास परिषद्ले होली महोत्सव मनाउँदै आइरहेकोे छ ।
एकातिर रङ र अबिर र अर्को तिर होरैया गानमा फेरी हजारो सहभागिता देखिने गर्छ । यहाँको होली आनन्दमय नै हुनेगर्छ ।
जनकपुरधामको हनुमाननगरबाट डोलासहित हिडेको टोली कल्याणेश्वर, गिरिजास्थान, मटिहानी, जलेश्वर, मडै, धु्रवकुण्ड घुमेर कञ्चनवन पुगेको छ ।