निर्वाचनअघि चुनावी घरदैलो कार्यक्रम स्वाभाविक तर,चुनावको परिणाम आइसकेपछि पनि पनि घरदैलो कार्यक्रममा किन ?

श्रावण ४, २०७४- निर्वाचनअघि चुनावी घरदैलो कार्यक्रम स्वाभाविक हो । तर, चुनावको परिणाम आइसकेपछि त्यो पनि पराजित गाउँ–गाउँ डुल्नु अनौठो हो । झापाको कमल गाउँपालिकामा भने अहिले पनि पनि घरदैलो कार्यक्रम निरन्तर चलिरहेको छ ।
प्रतिस्पर्धीसँग बराबर मत भएपछि गोला प्रथामा पराजित कांग्रेसका उम्मेदवार हुकुमसिंह राई सातायता घरदैलो कार्यक्रममा छन् । जनताको मतबाट नभई भाग्यबाट पराजित भएकाले मतदातालाई धन्यवाद दिन घर–घर पुगेको उनले बताए । ‘मलाई जनताले अत्यधिक मत दिएर जिताएकै हुन् । तर, भाग्यले साथ दिएन । गोलाप्रथामा हार्नुपर्‍यो,’ राईले भने, ‘मलाई विश्वास गरेर मत दिएकालाई धन्यवाद नदिइरहन सकिनँ ।’
गाउँपालिका अध्यक्षमा राई गोलामा एमालेकी मेनुका काफ्लेसँग पराजित भएका हुन् । दुवैले समान ८ हजार २ सय ७५ मत प्राप्त गरेका थिए । मत बराबर भएपछि निर्वाचन आयोगले गोलाप्रथाबाट निर्वाचित गराएको हो । जसमा पहिले गोला तानेका राईले ‘शून्य’ लेखेको कागज तानेपछि एमालेकी काफ्ले विजयी भएकी थिइन् ।
चुनावी नतिजा सहर्ष स्वीकार गरेका राई आफ्नो पराजयलाई प्राविधिक हारका रूपमा लिन्छन् । उनले एक सातामा गाउँपालिकाको वडा २, ३, ४, ६ र ७ का अधिकांश मतदाताको घर पुगेर धन्यवाद दिएका छन् । धन्यवाद दिन घरमा पुग्दा मतदाता खुसी भएको उनले प्रतिक्रिया दिए । राईले भने, ‘मेरो नतिजाबाट मतदाता पनि दु:खी भएका रहेछन् । उनीहरूले आफूलाई विकास चाहिएको र उक्त कार्यमा आगामी दिनमा साथ दिन आग्रह गरेका छन् ।’ उनले मतदाताले आगामी चुनावमा अझ संगठित भएर लाग्ने वचन दिएको बताए ।
‘मतदाताले देखाएको सहानुभूतिले आगामी दिनमा काम गर्न थप ऊर्जा मिलेको छ,’ उनले भने, ‘राजनीतिमा हार–जित स्वाभाविक हो । तर, हिजोका दिनमा जनतामाझ मैले गरेका प्रतिबद्धता पदमा नपुगे पनि बाहिर बसेरै पूरा गर्ने प्रयास गर्नेछु ।’ उनले धन्यवाद दिँदै गाउँपालिकाका ७ वटै वडाका मतदातामाझ पुग्ने जानकारी दिए ।
साविक लखनपुर र तोपगाछी गाविस मिलाएर कमल गाउँपालिका बनेको हो । उक्त क्षेत्रमा अहिलेसम्म एमालेबाहेकका उम्मेदवारले चुनाव जित्न सकेका छैनन् । यसपटक भने राईले एमाले उम्मेदवारलाई कडा टक्कर दिएपछि राईको लोकप्रियता बढेको छ । उनी अहिले कांग्रेस स्थानीय नेता–कार्यकर्तासहित धन्यवाद दिन घरदैलोमा व्यस्त छन् । उक्त गाउँपालिकाका ३७ पदमध्ये ३५ मा एमाले उम्मेदवार निर्वाचित छन् । कांग्रेसले एक वडाध्यक्षसहित दुई पदमा मात्र विजय हासिल गरेको छ ।
इकान्तिपुर बाट साभार ।