कर्मचारीको आन्दोलनले प्रतिनिधि सभाको बैठक स्थगित

काठमाडौं। संघीय संसद सचिवालयका कर्मचारीको आन्दोलनका कारण प्रतिनिधि सभाको बुधबारको बैठक प्रभावित भएको छ।

अतिरिक्त समयमा काम गरेको सेवा सुविधा माग गर्दै कर्मचारी गत जेठ २१ गतेदेखि आन्दोलित छन्।

सो क्रममा कर्मचारीले प्रतिनिधि सभा बैठकको प्रत्यक्ष प्रशारणमा बुधबार अपराह्न ५ बजेपछि सभामुख देवराज घिमिरेलाई मात्रै देखाएका थिए भने बोलेका सांसदलाई देखाएनन्।

स्वास्थ्य तथा जनसंख्या मन्त्रीले बजेटमा उठेका प्रश्नको जवाफ दिइसकेपछि सांसदहरूले पुरक प्रश्न गर्न थालेपछि प्राविधिक कर्मचारीहरूले सभामुखलाई मात्रै देखाएर युट्युबटमा प्रत्यक्ष प्रसारण गरेका थिए।

त्यसपछि स्वास्थ्य तथा जनसंख्या मन्त्रीले जवाफ दिएर पुरक प्रश्न लिएपछि त्यसको जवाफ दिन नपाउँदै सभामुखले सभाको बैठक स्थगित गरे।

प्रतिनिधि सभाको अर्को बैठक बिहीबार बिहान ११ बजेका लागि बोलाइएको छ।

कर्मचारीहरूले माग पूरा नभएको भन्दै धर्नालगायत आन्दोलनलाई जारी राखेका छन् भने आज प्रतिनिधि सभा बैठक नै प्रभावित बन्न पुगेको छ।