विवेकशील साझा राष्ट्रिय पार्टी हुनबाट बञ्चित

काठमाडौं, मंसिर २३ – विवेकशील साझा पार्टी राष्ट्रिय पार्टी हुनबाट वञ्चित भएको छ । विवेकशीलले सबैभन्दा बढी आशा गरेको काठमाडौं १ नम्बर क्षेत्रमा रवीन्द्र मिश्र पराजित भएपछि विवेकशील साझा पार्टी राष्ट्रिय पार्टी बन्ने संभावना लगभग सकिएको छ ।

मिश्र कांग्रेसका उम्मेदवार प्रकाशमान सिंहसँग ८१८ मतान्तरले पराजित हुनु भएको हो । राष्ट्रिय दल बन्न प्रत्यक्षतर्फ कम्तीमा एक सिट जित्नैपर्ने र समानुपातिकमा ३ प्रतिशत मत कटाउनु पर्ने अवस्थामा काठमाडौं १ को चुनौतिपूर्ण क्षेत्रबाट उम्मेदवारी दिएका मिश्रले प्रतिस्पर्धात्मक र सम्मानित मत पाए पनि विवेकशील साझालाई राष्ट्रिय पार्टी बनाउन सक्नु भएन ।

यसपटक राष्ट्रिय दल बन्ने र अर्कोपटक देशकै नेतृत्व गर्ने महत्वाकांक्षी नारा बोकेर चुनाव लडेका मिश्रले वाम गठबन्धन र कांग्रेसपछि तेश्रो ठुलो शक्ति बन्ने अनुमान गरिएको थियो । २०७० सालको दोश्रो संविधानसभाको चुनावमा समानुपातिकतर्फ राम्रो मत ल्याएर तेश्रो पार्टीको राप्रपा नेपाल जस्तै यसपटक विवेकशील साझाले पनि संसदमो तेश्रो शक्ति बन्ने धेरैको अनुमान थियो ।

तर नयाँ संविधानमा ३ प्रतिशतको थ्रेस होल्डको व्यवस्था र रवीन्द्र मिश्रको पराजयको कारण नै विवेकशील साझा राष्ट्रिय दल बन्न सकेन ।

काठमाडौं १ मा पराजित भएपनि मिश्र स्वयम्ले १० हजार बढी मत पाउनु भएको छ । यस्तै काठमाडौं क्षेत्र नं. २ मा सूर्यराज आचार्यले र ललितपुर ३ मा उज्ज्वलकृष्ण श्रेष्ठले ५ हजार बढी मत ल्याउनु भएको छ भने देशका अन्य ठाउँमा विवेकशील साझा पार्टीका उम्मेदवारले अरु साना दलको भन्दा राम्रै मत पाएका छन् ।

प्रत्यक्षतर्फ एक सिट नजिते पनि समानुपातिकतर्फबाट स्वतन्त्र सांसदको हैसियतले संसदमा आफ्ना एजेन्डा उठाउने अवसर भने विवेकशील साझालाई रहनेछ ।

बिबिसी नेपाली सेवाको प्रमुखबाट राजीनामा दिएर राजनीतिमा होमिएका मिश्रले सुरुमा साझा पार्टी नेपाल खोल्नु भएको थियो । तर यसले आफूलाई बलियोसँग स्थापित गर्न नसक्ने देखिएपछि मिश्रले लामो समयदेखि सामाजिक अभियानमा केन्द्रित विवेकशील नेपाली पार्टीसँग पार्टी एकता गर्नु भएको थियो ।

पार्टी खोले लगत्तै स्थानीय तहको चुनावमा मिश्रले साझा पार्टीका तर्फबाट काठमाडौं महानगरपालिको मेयरमा किशोर थापालाई उठाउनु भएको थियो । तर २१ बर्षकी रञ्जु दर्शनाले विवेकशील पार्टीबाट थापाको भन्दा राम्रो मत ल्याएपछि मिश्रले उज्ज्वल थापा नेतृत्वको विवेकशील नेपालीसँग पार्टी एकता गर्नु भएको थियो ।

६ महिनाअघि मात्रै दुई पार्टी मिलेर बनेको विवेकशील साझाले छोटो समयमै काठमाडौंमा राम्रो चर्चा र समर्थन पायो भने संसदमा स्वतन्त्र उम्मेदवार पठाउन सक्ने हैसियत बनाएको छ ।

‘गरेरै छाड्ने हो, समृद्धि हेरेरै मर्ने हो’ भन्ने रवीन्द्र मिश्रको महत्वाकांक्षी नाराले छोटो समयमा स्वदेश र विदेशमा रहेका युवाहरुले राम्रोसँग साथ पनि दिएका छन् । पुर्खाको विरासत थाम्ने राजनीति भन्दा परिवर्तनको राजनीति गर्ने मुख्य एजेन्डा लिएर चुनावी प्रतिष्पर्धामा उत्रिएको विवेकशील साझाले यसलाई थोरै भएपनि पुष्टि गरेको छ ।

मुख्य दलहरुले सबै क्षेत्र र तल्लो तहसम्मै संगठन बनाएर गरिरहेको ‘सिण्डिकेट’ राजनीतिलाई चुनौति दिँदै विवेकशीलले आफ्ना कुनै पनि भातृ संगठन नबनाउने घोषणा गरेको थियो ।

अन्ततः उसलाई यही घोषणा टिकाइराख्न र सजिलै संगठन निर्माण गरेर जित हात पार्न चुनौतिपूर्ण पनि बनेको छ । यसपटकको पराजयबाट विवेकशीलले तल्लो तहसम्मै संगठन निर्माण गरेर अर्कोपटक चुनाव लड्छ या त आफ्नो पुर्ववत अडान कायमै राख्छ, त्यो भने हेर्न बाँकी छ ।

तर पढेलेखेका र विभिन्न क्षेत्रका विज्ञहरु समेत मिलेर बनेको विवेकशील साझा पार्टीले जुझारु युवाहरुको समर्थन र परिवर्तनको आशा राखेका धेरै नागरिकलाई भने निराश बनाइसकेको छैन् ।