चितवनको डिपार्ट बस्तीमा आतङ्क मचाउने बाघ हात्तीको प्रयोग गरी नियन्त्रणमा, स्थानीयद्वारा सुरक्षाको माग

चितवन राष्ट्रिय निकुञ्जबाट बस्तीमा पसेको बाघलाई प्राविधिक टोलीले बिहीबार नियन्त्रणमा लिएको छ। राप्ती नगरपालिका–१ स्थित डिपार्ट बस्तीमा बिहान ६:४० बजे बाघ प्रवेश गरेपछि स्थानीय क्षेत्रमा त्रास फैलिएको थियो। निकुञ्ज र राष्ट्रिय प्रकृति संरक्षण कोषका कर्मचारी तथा प्राविधिकहरूले हात्तीको प्रयोग गरी बिहान साढे ११ बजे बाघलाई सफलतापूर्वक नियन्त्रणमा लिएका हुन्।

उक्त घटनामा बाघको आक्रमणबाट राप्ती नगरपालिका–१ का ६० वर्षीय ठाकुर अधिकारी सामान्य घाइते भएका छन्। घर नजिकै रहेका बेला बाघले एक्कासी आक्रमण गरेपछि घाइते भएका उनको भरतपुर सरकारी अस्पतालमा उपचार भइरहेको छ।

बस्तीमा छिरेको हिंस्रक वन्यजन्तुले मानवीय क्षति पुर्‍याउनुका साथै पशुचौपायामाथि पनि आक्रमण गरेको छ। सोही स्थानकी स्थानीयवासी दिला कुमारी तामाङको गोठमा बाँधिएको जर्सी गाईलाई बाघले आक्रमण गरी घाइते बनाएको छ।

निकुञ्ज र नियन्त्रण टोलीले बाघलाई नियन्त्रणमा लिएपश्चात् सुरक्षित रूपमा चितवन राष्ट्रिय निकुञ्जकै संरक्षण र नियन्त्रणमा बुझाएको छ। प्राविधिकहरूले डार्ट गरेर बाघलाई बेहोस बनाई सुरक्षित स्थानतर्फ लगेका हुन्।

पछिल्लो समय चितवनका मध्यवर्ती तथा मानव बस्ती नजिकका क्षेत्रमा दिनप्रतिदिन वन्यजन्तुको आवतजावत बढ्दै गएको छ। मानव–वन्यजन्तु द्वन्द्वका घटना तीव्र रूपमा वृद्धि भइरहेकाले स्थानीयवासीले आफूहरूको सुरक्षा व्यवस्थापनमा गम्भीर ध्यान दिन सम्बन्धित निकायसँग माग गरेका छन्।