बाढीपछि हैजा फैलिने खतरा: नुवाकोट र रसुवामा खोप अभियान तीव्र
सारांश
- बाढी तथा प्राकृतिक विपत्तिका कारण खानेपानी र सरसफाइ संरचनामा क्षति पुगेपछि उत्पन्न हुनसक्ने सरुवा रोगको जोखिम न्यूनीकरण गर्न स्वास्थ्य तथा खाद्य स्वच्छता मन्त्रालयले प्रभावित क्षेत्रहरूमा हैजाविरुद्धको खोप अभियानलाई प्राथमिकताका साथ अघि बढाएको छ।
- बाढी प्रभावित बासिन्दालाई सम्भावित हैजा सङ्क्रमणबाट जोगाउने उद्देश्यले सरकारले दुर्गम तथा उच्च जोखिमयुक्त जिल्लाहरूमा आवश्यक खोप र शीतभण्डारण सामग्रीको व्यवस्थापन तीव्र बनाएको हो।
- यसै क्रममा मन्त्रालयले मङ्गलबार नुवाकोट जिल्लाका लागि ८० हजार ५ सय २३ डोज (२३ बक्स) हैजाविरुद्धको खोप आपत्कालीन रूपमा रवाना गरेको छ।
बाढी तथा प्राकृतिक विपत्तिका कारण खानेपानी र सरसफाइ संरचनामा क्षति पुगेपछि उत्पन्न हुनसक्ने सरुवा रोगको जोखिम न्यूनीकरण गर्न स्वास्थ्य तथा खाद्य स्वच्छता मन्त्रालयले प्रभावित क्षेत्रहरूमा हैजाविरुद्धको खोप अभियानलाई प्राथमिकताका साथ अघि बढाएको छ। बाढी प्रभावित बासिन्दालाई सम्भावित हैजा सङ्क्रमणबाट जोगाउने उद्देश्यले सरकारले दुर्गम तथा उच्च जोखिमयुक्त जिल्लाहरूमा आवश्यक खोप र शीतभण्डारण सामग्रीको व्यवस्थापन तीव्र बनाएको हो।
यसै क्रममा मन्त्रालयले मङ्गलबार नुवाकोट जिल्लाका लागि ८० हजार ५ सय २३ डोज (२३ बक्स) हैजाविरुद्धको खोप आपत्कालीन रूपमा रवाना गरेको छ। खोपको गुणस्तर र प्रभावकारिता सुनिश्चित गर्न १० थान फ्रिज-फ्री भ्याक्सिन क्यारियर, ०.६ लिटर क्षमताका २२० थान आइस प्याक तथा ८ थान फ्रिज ट्याग समेत जिल्लातर्फ पठाइएको छ।
अर्को संवेदनशील जिल्ला रसुवाका लागि भने यातायातको असुविधालाई ध्यानमा राख्दै यसअघि नै नेपाली सेनाको हेलिकप्टरमार्फत खोप ढुवानी गरिसकिएको छ। हिमाली तथा दुर्गम भेगका बाढी प्रभावित समुदायलाई लक्षित गरी रसुवामा आउँदो बिहीबारदेखि खोप अभियान प्रत्यक्ष रूपमा सञ्चालन गर्ने कार्यतालिका मिलाइएको छ।
अविरल वर्षा र बाढीका कारण स्थानीय पिउने पानीका मुहानहरू दूषित हुनुका साथै सरसफाइ प्रणालीमा गम्भीर असर परेकाले महामारी फैलिने खतरा बढेको छ। यस्तो संवेदनशील अवस्थामा हैजा र अन्य पानीजन्य सरुवा रोगको सङ्क्रमण रोकथाम गर्न मन्त्रालयले पूर्वतयारीका साथ खोप तथा जीवनरक्षक औषधि व्यवस्थापनलाई पहिलो प्राथमिकतामा राखेको जनाएको छ।
विपत्तिको समयमा नागरिकको स्वास्थ्य सुरक्षा सुनिश्चित गर्नु राज्यको प्राथमिक दायित्व भएकाले प्रभावित क्षेत्रका स्वास्थ्य संस्थाहरूलाई उच्च सतर्कतामा राखिएको छ। मन्त्रालयले सरसफाइमा ध्यान दिन अपिल गर्दै लक्षित क्षेत्रका सबै बासिन्दालाई नजिकैको खोप केन्द्रमा पुगेर खोप सेवा लिन र स्वास्थ्यकर्मीको सल्लाह पालना गर्न आग्रह गरेको छ।
कुल कमेन्ट:
0
Asmita Ramtel
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया