अबको प्रधानमन्त्री ओली र एकीकृत पार्टीको अध्यक्ष प्रचण्ड

काठमाडौं । नेकपा एमालेका नेता पार्वत गुरुङले एमाले–माओवादी केन्द्रबीच पार्टी एकता हुने भन्दै अबको प्रधानमन्त्री केपी शर्मा ओली नै बन्ने पक्का भैसकेको स्पष्ट पारे । उनले थपे, ‘प्रधानमन्त्री को बन्छ ? भन्नेबारे अब कुनै अलमल छैन, ओलीजी नै प्रधानमन्त्री बन्नुहुन्छ, पुष्पकमल दाहाल प्रचण्ड पार्टी अध्यक्ष बन्नुहुन्छ ।’

बिहिबार राजधानीमा आयोजित एक कार्यक्रममा उनले प्रचण्ड एकीकृत पार्टीको अध्यक्ष बन्दा कुनै आपत्ति नहुने समेत जिकिर गरे । उनले दुई पार्टीबीच एकता हुँदैन कि ? भनेर प्रचार गर्नु गलत भएको समेत स्पष्ट पारे ।

‘भोलिबाट एकताको लागि छलफल सुरू हुँदैछ, अब पनि एकता हुँदैन भन्नु जनताको मत विपरित हुन्छ’ उनले भने, ‘जसले एकता मान्दिन भन्छ उ सिद्दिन्छ ।’

त्यस्तै उनले प्रधानमन्त्री शेरबहादुर देउवाले तत्काल राजिनामा दिनुपर्ने समेत बताए । कार्यक्रममा बोल्दै उनले भने, ‘अहिलेको जनमतलाई सम्मान गर्दै उहाँले राजिनामा दिनुपर्छ, तर अहिलेको सरकार सत्ता लम्ब्याएर अस्थिरतातर्फ जान खोजेको हो कि ? भन्ने आभाष हुन थालेको छ ।’