अब गन्न बाँकी १५ हजार मतभित्र नारायणकाजीको भविष्य !

मङ्सिर २३, काठमाडौँ | देशभर चासोको क्षेत्र अर्थात दुई हेभीवेट नेताहरु बाबुराम भट्टराई र नारायणकाजी श्रेष्ठको क्षेत्र गोरखा २ मा बाबुराम भट्टराईले निरन्तर नारायणकाजी श्रेष्ठ बिरुद्ध मतान्तर बढाउँदै लगेका छन् ।

अपडेट भएको मत परिणाम अनुसार भट्टराई र श्रेष्ठको मतान्तर ३ हजार ६ सय ४२ मतको अन्तर रहेको छ ।

पछिल्लो मत परिणाम अनुसार भट्टराईले २३ हजार १ सय १७ मत ल्याएका छन् भने नारायणकाजी श्रेष्ठले १९ हजार ४ सय ७५ मत ल्याएका छन् । उता गोरखाकै क्षेत्र नम्बर १ मा भने कम्युनिष्ट गठवन्धनका हरिराज अधिकारीले १५ हजार २९९ मत ल्याएका छन् भने काँग्रेसका चिनकाजी श्रेष्ठले १३ हजार २२२ मत ल्याएका छन् ।

यस अघिको मतलाई आधार मान्ने हो भने भट्टराईले झनै अग्रता बढाएका छन् । ३ हजारको हाराहारीमा मतान्तर भएपनि अहिले उक्त मतान्तर बढेर ३६०० बढी भएको छ ।

गोरखा २ मा अहिलेसम्म ४५ हजार १ सय ७३ मत गणना भएको छ भने अब १५ हजार मत गणना गर्न बाँकी रहेको छ । यसैमा नारायणकाजी श्रेष्ठले भट्टराईलाई हराउन ३६ सय मतलाई आफ्नो पकडमा पारेर अग्रता लिनुपर्ने हुन्छ, अन्यथा निरन्तर भट्टराईको पक्षमा मत आईरहे नारायणकाजी श्रेष्ठको प्रतिनिधिसभा सांसदको लागि भएको भिडन्त बालुवामा पानी सरह हुनेछ ।