नेपालमा कात्तिकभित्रै भारतीय रेल कुद्ने

काठमाडौं, २७ असार । भारतसँग सीमा जोडिएका तराईका केही ठाउँमा आगामी कात्तिकभित्रै रेल कुद्ने भएको छ ।

भारतीय सहयोगमा निर्माण भइरहेको रेलमार्ग कात्तिकभित्रै सम्पन्न हुने भएपछि यो वर्षभित्रै नेपालमा रेल कुद्ने भएको हो । नेपाल–भारत संयुक्त कार्यसमूहको मंगलबार काठमाडौंमा बसेको बैठकले कात्तिकभित्रै रेल ल्याउने गरी काम सम्पन्न गर्ने निर्णय गरेको छ ।

नेपाल–भारत सीमाक्षेत्रका चार ठाउँमा रेलमार्ग निर्माणको काम भइरहेको छ । प्रधानमन्त्री केपी शर्मा ओलीको भारत भ्रमणका अवसरमा नेपालमा रेलमार्ग निर्माणसम्बन्धी सहमति भएको थियो ।

बैठकले भारतको जयनगरदेखि बिजलपुर हुँदै बर्दिवाससम्म, जोगवनीदेखि विराटनगर, जयनगरदेखि जनकपुर ९कुर्था० र जोगवनीदेखि नेपालको भन्सार क्षेत्रसम्मको रेलमार्ग निर्माण कात्तिकभित्रै सम्पन्न गर्ने निर्णय गरेको छ । समूहको तेस्रो बैठकमा रेलवेमा प्रस्तुत स्थानहरूमा भइरहेको प्रगतिको सराहना गर्दै रेलसेवा सञ्चालनका लागि आइपर्ने आवश्यकतामा व्यापक छलफल गरिएको थियो ।

भारत–नेपाल अन्तरदेशीय रेलसेवा सञ्चालनसम्बन्धी समझदारीपत्रमा छलफल गर्न बसेको बैठकमा भारतका तर्फबाट रेलवे मन्त्रालयका कार्यकारी निर्देशक मनोजकुमार श्रीवास्तव र नेपालका तर्फबाट भौतिक पूर्वाधार तथा यातायात मन्त्रालयका सहसचिव केशवकुमार शर्माले नेतृत्व गरेका थिए ।

चार वटै आयोजना कात्तिकभित्र सम्पन्न गर्ने बैठकको निष्कर्ष छ । समूहले रेलसेवा सञ्चालन, समझदारीपत्रको अन्तिम स्वरूप टुंग्याउने विषयको आवश्यकता पहिचान गर्दै उक्त कार्य शीघ्र सञ्चालन गर्न पनि जोड दिएको छ । यसअघि भारत–नेपाल अन्तरदेशीय रेलसेवाको सञ्चालनका लागि गठित संयुक्त समितिको बैठक ५ र ६ असारमा काठमाडौंमा नै भएको थियो ।

सवारी आवागमनको सहज आवतजावत, सामान ओसारपसार, दुवै देशका जनताबीच सम्बन्ध विस्तार तथा दुई देशबीच व्यापार, वाणिज्य र आर्थिक सहकार्यलाई सुदृढ गर्नका लागि भारत–नेपाल सीमामा रेलमार्ग पूर्वाधारको काम भइरहेको हो । यसका साथै अन्य पूर्वाधारका विकासका लागि पनि भारत र नेपाल सरकार दुवै प्रतिबद्ध रहेका पनि बैठकमा बताइएको  थियो ।

रेलसेवा सञ्चालनले दुई देशका जनताबीचको सम्बन्ध तथा आर्थिक क्रियाकलापलाई सुदृढ गरी भारत–नेपाल सम्बन्धलाई थप नयाँ उचाइ प्रदान गर्ने अपेक्षा लिइएको काठमाडौंस्थित भारतीय दूतावासद्वारा जारी विज्ञप्तिमा उल्लेख छ ।

निर्धारित समयमै रेलमार्ग निर्माण पूरा गर्न बाँकी कामलाई तीव्र बनाइने बैठकको निर्णय रहेको पनि दूतावासको विज्ञप्तिमा उल्लेख छ ।