अमेरिका र उत्तर कोरियाको शिखर बैठक नहुने !
सारांश
- वासिङ्टन, ९ जेठ ।
- १२ जुनमा हुने भनिएको अमेरिका र उत्तर कोरियाबीचको शिखर बैठक पछि हुने भएको छ ।
- अमेरिकी राष्ट्रपति डोनाल्ड ट्रप्पले उत्तर कोरियासँग हुने भनिएको बैठक समयमै नहुन पनि सक्ने जानकारी दिएका हुन् ।
वासिङ्टन, ९ जेठ । १२ जुनमा हुने भनिएको अमेरिका र उत्तर कोरियाबीचको शिखर बैठक पछि हुने भएको छ ।
अमेरिकी राष्ट्रपति डोनाल्ड ट्रप्पले उत्तर कोरियासँग हुने भनिएको बैठक समयमै नहुन पनि सक्ने जानकारी दिएका हुन् ।
ट्रम्पले मंगलबार संवाददातासँग कुरा गर्दै १२ जुनमा उत्तर कोरियाली नेता किम जोङ उनबीच सिंगापुरमा हुने भनिएको बैठक ताकिएको समयमा हनेमा संका व्यक्त गरे ।
उनले उत्तर कोरियाले केही शर्तहरू पूरा गर्नुपर्ने अवस्था रहेको र नगरेमा उक्त शिखर बैठक निर्धारित समयमा नबस्न पनि सक्ने बताएका हुन् ।
राष्ट्रपति ट्रम्पले तर यसको मतलब बैठक नै नबस्ने भने नभएको प्रष्ट पारे । उनले उत्तर कोरियाले आवश्यक शर्तहरु पूरा गर्नुपर्नेमा जोड दिएका थिए ।
तर प्योङयाङले भने संयुक्त राज्य अमेरिकाले एकपक्षीय रुपमा उत्तर कोरियालाई मात्र निःशस्त्रीकरणमा जोड दिने गरेको आरोप लगाएको छ । सोही कारण तथा केही दिनयता देखि दक्षिण कोरियाको राजधानी सोलमा जारी रहेको अमेरिका र सोलको संयुक्त सैन्य अभ्यासका कारण पनि वार्तामा नबस्ने चेतावनी दिएको थियो ।
दक्षिण कोरियाका राष्ट्रपति मुन जाय इनको अमेरिका भ्रमणमा गएका छन् । सोही क्रममा मङ्गलबार अमेरिकी राष्ट्रपति ट्रम्प र इनबीच भएको भेटवार्तापछि ह्वाइट हाउसमा सम्वाददाताहरुसँग राष्ट्रपति ट्रम्पले सो प्रतिक्रिया दिएका हुन् ।
उनले भने, ‘मैले उत्तर कोरियाली नेता किमलाई गम्भीर हुनुहुन्न भन्दिन, उहाँ कोरियाली प्रायद्वीपमा शान्ति स्थापनाका लागि गम्भीर नै हुनुहुन्छ । तर पनि केही शर्तहरु छन् जुन वार्ता अगावै पूरा हुनुपर्छ ।’
आगामी उक्त शिखर बैठक आयोजना हुने गरी साझा विन्दु पहिल्याउने विषयमा छलफल गर्न राष्ट्रपति इन वासिङ्टनमा छन् । उनी मङ्गलबार नै अमेरिका पुगेका थिए ।
उक्त शिखर बैठक आयोजनाका लागि वातावरण बनाउन दक्षिण कोरियाली राष्ट्रपति इनका अतिरिक्त यसअघि पनि केही उच्चस्तरीय अधिकारीहरु वासिङ्टन पुगेका थिए ।
दक्षिण कोरियाली राष्ट्रपति इन र राष्ट्रपति ट्रम्पबीचको यस बैठकले अमेरिका र उत्तर कोरियाको बीचमा हुन लागेको उक्त जुन बैठकको लागि विविध विषयहरू तय गर्ने पनि ठानिएको छ ।
राष्ट्रपति ट्रम्पले उक्त ऐतिहासिक बैठकमा केही विलम्ब भए पनि वार्ता भने हुने दाबी गरे । तर पनि पछिल्लो समयमा वार्तामा नबस्ने भनी उत्तर कोरियाबाट आएको प्रतिक्रियाको बारेमा भने आफू आश्चर्यमा परेको बताए ।
राष्ट्रपति ट्रम्पले जुन १२ मा भएन भने सो बैठक कहिले हुन्छ त भन्ने बारेमा भने केही बताएनन् । उनले आगामी केही समयमा त्यसबारेमा मिति तय हुने बताए ।
प्रतिक्रिया