उपसभामुखमा दुर्गा पौडेलको संभावना

काठमाडौं। तत्कालीन सभामुख कृष्णबहादुर महरा यौन दुव्र्यवहारको आरोपमा जेल परेपछि नेकपाभित्र नयाँ सभामुखको खोजी सुरु भएको छ। तर नेकपाले सभामुख आफूसँग राख्न उपसभामुख पद भने गुमाउनु पर्ने हुन्छ। संवैधानिक व्यवस्था अनुसार सभामुख र उपसभामुख फरक दल र लिंगको हुनुपर्छ।

यस्तो अवस्थामा नेकपाले सभामुख आफूसँग राख्न वर्तमान उपसभामुख शिवमाया तुम्बाहाम्फेले पदबाट राजीनामा दिनुपर्ने हुन्छ। नेकपाले वर्तमान उपसभामुखलाई राजीनामा गर्न लगाएर उनलाई अन्तै व्यवस्थान गर्ने तयारी गरेको छ। प्रधानमन्त्री केपी ओलीले पूर्व सभामुख सुवास नेम्वाङलाई पुन सभामुख बनाउन चाहेका छन्।

नेम्वाङको नामप्रति अर्का अध्यक्ष प्रचण्ड पनि सकारात्मक नै रहेका छन्। तर यसअघि भागबण्डका आधारमा पूर्व माओवादीलाई सभामुख र पूर्व एमालेलाई उपसभामुख दिइएको हुनाले अहिले पनि त्यही सहमति अनुसार सभामुख पद पूर्व माओवादीलाई दिनुपर्ने तर्क गर्न थालिएको छ। यस्तो अवस्थामा पूर्व माओवादीबाट देव गुरुङ, अग्नि सापकोटा र लेखराज भट्ट मध्ये

एक जना सभामुख बन्ने छन्। सभामुख जो भने पुरुष हुने र जुन पक्षबाट बनेपनि नेकपाकै हुने भएकाले नेकपाले उपसभामुख दल भने गुमाउने निश्चित छ। यस्तो अवस्थामा नेकपाले उपसभामुख अन्य दललाई दिनुपर्छ। प्रमुख प्रतिपक्ष नेपाली कांग्रेस, सत्तारुढ दल समाजवादी पार्टी र प्रतिपक्ष राजपालाई उपसभामुख नदिने रणनीति नेकपाले बनाएको छ।

नेकपाले राष्ट्रिय जनमोर्चाबाट निर्वाचन सांसद दुर्गा पौडेललाई उपसभामुख बनाउने तयारी गरेको स्रोतले जनाएको छ। पौडेल राष्ट्रिय जनमोर्चाबाट नेकपाको सहयोगमा निर्वाचित सांसद हुन्।