एकै परिवारका ११ जना झुण्ड्याइएको अवस्थामा फेला

भारतको नयाँ दिल्लीमा एक परिवारका ११ जना मानिसलाई झुण्ड्याइएको अवस्थामा शव भेटिएको छ ।

दिल्लीको बुरारी नजिकै एक घरमा आफ्नै आँखामा कपडाको पट्टि बाँधिएको र सबैलाई झुण्ड्याएको अवस्थामा ११ जनाको शव भेटिएको स्थानीय प्रहरीले जनाएको छ ।

यसरी झुण्ड्याइएको अवस्थामा भेटिएकामा चारजना पुरुष, तीनजना महिला र चार बालिका रहेका छन् । घरमा भेन्टिलेटरको रुपमा प्रयोग गरिएको फलामको डण्डीमा उनीहरुलाई झुण्ड्याएको अवस्थामा भेटिएको प्रहरी अधिकारीले बताएको हिन्दुस्तान टाइम्सले जनाएको छ ।

उनीहरु सबैको हत्या भएको हुन सक्ने प्रहरीले आशंका गरेको छ । घटनाका बारेमा अनुसन्धान भइरहेको छ ।

आइतबार बिहान घरमै झुण्ड्याइएको अवस्थामा देखिएपछि स्थानीय बासिन्दाले प्रहरीलाई खबर गरेका थिए । प्रहरीले छिमेकीसँग सोधपुछ गरिरहेको छ भने सिसिटिभी फुटेज पनि हेरिरहेको छ । घटनास्थलमा सुसाइड नोट नरहेको प्रहरीले उल्लेख गरेको छ ।