ओलीले भने कांग्रेस म्याद गुज्रिएको औषधि हो

एमाले अध्यक्ष केपी शर्मा ओलीले कांग्रेसलाई म्याद गुज्रिएको औषधिको संज्ञा दिएका छन् ।प्रेस चौतारी झापाले शुक्रबार दमकस्थित ओली निवासमा आयोजना गरेको पत्रकार भेटघाटमा बोल्दै अध्यक्ष ओलीले म्याद सकिएको औषधि सेवन गरे स्वस्थ मानिस पनि बिरामी बताए । उनले कांग्रेस अब काम नलाग्ने पार्टी भएको टिप्पणी गरे । हिजोका दिनमा वीपी, गणेशमानजस्ता नेताले लोकतन्त्रको पक्षमा लडे पनि अहिलेको कांग्रेस व्यक्तिगत स्वार्थमा फसेको अध्यक्ष ओलीको आरोप छ ।

मंसिर २१ गते हुने निर्वाचनका लागि झापा क्षेत्र नम्बर ५ बाट बिहीबार उम्मेदवारी दिएका नेता ओलीले मुलुकमा संसदीय होस या अरु जुनसुकै व्यवस्था भए पनि मुलुकको समृद्धि, विकास जनताको सुरक्षा र शान्ति अमनचयन नेपाली जनतालाई दिनुपर्ने बताए । उनले देश बनाउन संकल्प, नीति, कार्यक्रम र निष्ठा आवश्यक हुने बताए ।

नेता ओलीले आफू सरकारमा रहेका बेला वैदेशिक रोजगारीमा जाने युवाको संख्या १८ प्रतिशत घटेको उल्लेख गर्दै अब वाम गठबन्धनले जितेपछि वैदेशिक रोजगारीलाई कम गर्दै शून्यमा झार्ने दाबी गरे । अब हुने निर्वाचन भयरहित र निष्पक्ष हुनपर्ने अध्यक्ष ओलीको भनाइ छ ।