गोलीगठ्ठा उत्पादन गर्ने प्लान्ट स्थापनामा पहल लिन रक्षामन्त्रीलाई आग्रह

काठमाडौं, २८ भदौ । नेपालस्थित दक्षिण कोरियाका राजदूत पार्क योङ सिकले उपप्रधानमन्त्री एवं रक्षामन्त्री ईश्वर पोखरेलसँग आज अपरान्ह रक्षा मन्त्रालयमा शिष्टाचार भेट गरेका छन् ।

भेटका अवसरमा नेपाल र दक्षिण कोरियाबीचको कुटनीतिक सम्बन्ध, सरकारका कार्ययोजना, आर्थिक विकास, दुई मुलुकका बीचको सैन्य तालिम तथा सहकार्य एवं प्रविधि हस्तान्तरण लगायतका विषयमा छलफल भएको रक्षामन्त्रालयका प्रवक्ता ऋषि राजभण्डारीद्वारा जारी विज्ञप्तिमा जनाइएको छ ।

राजदूत सिकले नेपाल र कोरियाबीचको सम्बन्ध सुदृढ गर्दै सैन्य क्षेत्रमा दुई देशबीच भइरहेको तालिमको आदानप्रदानले दुबै देश लाभान्वित भएको बताए । उनले भविष्यमा पनि यस प्रकारको तालिमको आदानप्रदान निरन्तर हुने विश्वास व्यक्त गर्दै नेपाली सेनाका लागि आवश्यक पर्ने गोलीगठ्ठा उत्पादन गर्ने प्लान्ट स्थापना गर्न चालिएको प्रक्रिया अगाडि बढिसकेको सन्दर्भमा केही विलम्व भएकोले रक्षामन्त्रीबाट थप पहलको अपेक्षा गरेका थिए ।

त्यस्तै दुई पक्षीय सैन्य सहयोगका लागि स्टाफ कलेजमा तालिम आदानप्रदान गर्ने विषयमा समझदारी प्रक्रिया अघि बढिसकेको बताउँदैं राजदूत सिकले विश्व शान्ति स्थापनार्थ नेपाली सेनाको योगदान मुक्तकण्ठले प्रशंसा गरेका थिए । विश्व शान्ति कायम गर्ने कुरामा नेपाली सेनाले अझ उत्कृष्ट कार्य गर्ने विश्वास व्यक्त पनि गरे । यसै सन्दर्भमा राजदूत सिकले कोरियाले नेपाली सेनासँग सहकार्य गर्न चाहिरहेको बताउँदै मित्रताको भावलाई अझ परिष्कृत गर्न चाहेको बताए ।

सो अवसरमा उपप्रधानमन्त्री एवं रक्षामन्त्री पोखरेलले महामहिम राजदूतलाई शिष्टाचार भेटको लागि धन्यवाद व्यक्त गर्दै नेपाल र दक्षिण कोरियाबीचको सम्बन्ध प्रगाढ रहेको बताए । नेपाल लामो संक्रमणपछि विकास र स्थायित्वतर्फ अघि बढिरहेको बताउँदै विगतमा जस्तै आगामी दिनमा पनि दक्षिण कोरियाको सहयोग निरन्तर हुनेमा विश्वास व्यक्त गरेका थिए ।

उपप्रधानमन्त्री पोख्रेलले सैन्य क्षेत्रको सदृढिकरणका निम्ति दुई देशबीच सम्पन्न भएका सम्झौता शीघ्र कार्यान्वयनमा ल्याउने विश्वास दिलाएका थिए । गोलीगठ्ठा उत्पादन गर्न प्लान्ट जडान स्थापना गर्ने सन्दर्भमा मन्त्रीपरिषदबाट विलम्व भएको महसुस भएको बताउँदै सरकार यस कुरामा सकारात्मक रहेको बताए । पोख्रेलले राजनीतिक परिवर्तनले केही विलम्व भएको बताउँदैं यसको अवधारणा आफैमा राम्रो रहेको र यो साझा सरोकारको विषय रहेको बुझिदिन आग्रह गरे ।

कोरियाली सेनाले नेपालमा हाई अल्ट्युचिड माउण्टेन वारफेयर ट्रेनिङ लिने गरिरहेको बताउदैं यसलाई निरन्तरता दिइने बताए । कोरियाद्वारा नेपालको आर्थिक सहयोगको क्षेत्रमा राम्रो योगदान हुँदैं आएको बताउँदैं सैन्य क्षेत्रमा प्राविधिक सहयोगको अपेक्षा गरेको बताए । शिष्टाचार भेटमा रक्षा मन्त्रालयका सहसचिव ऋषि राजभण्डारी तथा परराष्ट्र मन्त्रालयका प्रतिनिधि समेतको उपस्थिति थियो ।