दबावमा गृहमन्त्री थापा

काठमाडौं, १२ असाेज। दैनिकजसो मुलुकका विभिन्न स्थानमा बलात्कार र हत्याका घटना सार्वजनिक हुन थालेपछि गृह प्रशासन र प्रहरी संगठनमाथि नै प्रश्न उठ्न थालेको छ। प्रहरीको अनुसन्धान गर्ने क्षमता र मुलुकभरको शान्ति सुरक्षा गर्ने जिम्मा लिएको गृह प्रशासनप्रति पनि जनआक्रोश बढेको छ। बिहीबार प्रतिनिधिसभाको बैठकमा सत्तारुढ दलका शीर्ष नेताले सरकारको चर्को आलोचना गरे। विशेष गरी मुलुकभरको शान्ति सुरक्षाको जिम्मेवारी लिएको गृह प्रशासनप्रति धेरै प्रश्न उठ्न थालेको छ। यसैबीच शुक्रबार सत्तारुढ नेपाल कम्युनिष्ट पार्टी (नेकपा) का नेतृहरुले महिला र बालबालिकामाथि बढ्दो जघन्य अपराधका घटना नियन्त्रणका लागि ठोस कदम चाल्न सरकारलाई दबाव दिएका छन्।

सत्तारुढ नेपाल कम्युनिष्ट पार्टी (नेकपा) का महिला नेतृहरुले गृहमन्त्री रामबहादुर थापासँग सामूहिक भेट गरी महिला तथा बालबालिकामाथि हुने हत्या, बलात्कारलगायतका जघन्य अपराधका घटना हुनै नदिने गरी आवश्यक कदम चाल्न माग गरेका हुन्। पीडित पक्षलाई समेत लिएर शुक्रबार बिहान गृह मन्त्रालय पुगेका उनीहरुले पीडितलाई न्याय दिन र पीडकलाई फाँसीको सजाय दिने व्यवस्था गर्न माग गर्दै गृहमन्त्री थापालाई ध्यानाकर्षण पत्र समेत बुझाएका छन्। त्यसक्रममा महिला नेतृहरुले पार्टी नेता समेत रहेका गृहमन्त्री थापालाई सरकारले महिलामाथि हुने जघन्य अपराधका घटना नियन्त्रण गर्न नसकेकोमा आफूहरु आफैं लज्जित हुने अवस्था पुगेको गुनासो गरेका थिए। बढ्दो महिला तथा बालिकामाथि हुने गरेका हत्या, बलात्कारलगायतका जघन्य अपराधका घटना हुनै नदिने गरी ठोस कदम चाल्न गृहमन्त्री थापालाई ध्यानाकर्षण पत्र बुझाउनु परेको नेपाल कम्युनिष्ट पार्टी (नेकपा) की नेतृ तथा प्रदेश ३ की सांसद अष्टलक्ष्मी शाक्यले बताइन्।

गृहमन्त्री थापाले पनि महिला र बालबालिकामाथि जघन्य अपराधका घटना हुन नदिन सरकार जिम्मेवार ढंगले लागि परेको दावी गरेका थिए। उनले बढ्दो महिला तथा बालिकामाथि हुने हत्या, बलात्कारलगायतका ९० प्रतिशत घटनाको छानवीन गरी दोषीलाई कार्वाही गरिएको र निर्मला पन्तलगायतका घटनाका दोषीलाई पनि छिट्टै कानुनी कठघरामा उभ्याउने आश्वासन महिला नेतृलाई दिएका थिए। मुलुकमा महिला र बालिकामाथि हत्या, बलात्कारलगायतका घटना बढदै गएपछि सत्तारुढ दलकै नेताहरुले त्यसलाई नियन्त्रण गर्न सरकारलाई दबाव दिन सुरु गरेका छन्। उनीहरुले सो घटनाका सम्बन्धमा गृहमन्त्री थापा गम्भिर नभएको आरोप लगाउँदै आएका छन्।