नक्कली नेपाली नागरिकता लिएकालाई एक घण्टामै उन्मुक्ति

मधेश आन्दोलनपछि तराईका जिल्लामा ब्यापक रुपमा भारतीयले नागरिकता लिएको सार्वजनिक भयो । ४० लाख नागरिकता चक्लेट बाँडेजसरी बाँडिएको बिषय अहिले पनि बेलाबेलामा उठ्ने गरेको छ । मधेशमा आदिबासी मधेशीभन्दा आयातित मधेशीको बाहुल्य भएका कारण जनकपुरमा पहाडे समुदायमाथि आक्रमण भयो । ठूलो संख्यामा पहाडी समुदायलाई विस्थापित गराइयो । यसरी नक्कली नागरिकता बितरण गरिएका पोलहरू धमाधम खुलिरहेका छन् ।

पोल खुलेपछि पनि प्रमुख जिल्ला अधिकारीलाई मिलाएर नक्कली नागरिकताको छानबिन नै नगरी उन्मुक्ति दिएको घटना जनकपुरमा देखिएको छ । धनुषाका प्रमुख जिल्ला अधिकारी प्रदीपराज कँडेलले नक्कली नागरिकता लिएको प्रमाणसहित उजुरी परेका चन्द्रभूषण प्रसाद मुन्टु र उनका दिदी भिनाजुलाई उन्मुक्ति दिएका छन् । नक्कली नागरिकता लिएको प्रमाणसहित उजुरी परेका मुन्टुलाई प्रजिअ कँडेलले पक्राउ परेको १ घन्टामै उनीहरूलाई छाडेका थिए ।

कृष्ण हार्डवयर्सका संचालकसमेत रहेका प्रभुनारायण महतोले पैसाको प्रलोभनमा परी भारतको बिहार बासुपट्टिका चन्द्रभूषण प्रसाद मुन्टुलाई बंशजको आधारमा मोरङ मझारे ४ बाट नागरिकता दिलाएका थिए । उनको नागरिकता नम्बर ०५३०४२÷४६५ हो । जनकपुरमा बस्दैआएका महतोले त्यहीँ बस्ने र हार्डवयर्सकै ब्यवसाय गर्ने चन्द्रभूषण प्रसादलाई नागरिकता दिलाएका थिए । चन्द्रभूषण प्रसादले नक्कली बाबु बनाएर नागरिकता लिएको उजुरी १० दिनअघि बिजय महतोले जिल्ला प्रशासन कार्यालय धनुषामा दिए ।

चन्द्रभूषणप्रसाद बिहार बासुपट्टिका नागरिक भएको तर उनले झुक्याएर नेपाली नागरिकता लिएको प्रमाणसहित उजुरी परेपछि जिल्ला प्रशासन कार्यालयले उनलाई पक्राउ ग¥यो । तर एक घन्टामै उनी छुटे । यद्यपि छाड्ने क्रममा प्रजिअ कँडेलले ठूलै रकम घुस लिएको आरोप छ । चन्द्रभूषणले आफूले मात्र होइन दिदी माधुरी महतोलाई पनि अंगीकृत नागरिकता दिलाएका थिए । दिदीको रामशंकर महतोसँग विवाह भइसकेको छ । रामशंकर महतो बिहारको सीतामढीका हुन् ।

यसरी नक्कली बाबु बनाएर बंशज र अंगीकृत नागरिकता बनाउने चन्द्रभूषण र माधुरीका बिरुद्ध उजुरी पर्दा पनि आर्थिक चलखेलमा उनीहरूलाई उन्मुक्ति दिइएको छ । चन्द्रभूषणप्रसाले सामाजिक संजालमा पनि बिहार बासुपट्टि भनेर उल्लेख गरेका छन् । चन्द्रभूषण नक्कली बाबु बनाएर नागरिकता लिएपछि हाल धनुषा तरुण दलको जिल्ला कार्यसमितिमा पनि रहेका छन् । नेपाली कांग्रेसका उपसभापति विमलेन्द्र निधिको नजिक भन्ने गर्दछन् ।

नक्कली नागरिकता लिने चन्द्रभूषण छुटेपछि प्रशासन कार्यालयमा उजुरी दिने बिजय महतो भने पलायन भएका छन् । चन्द्रभूषण प्रसादको धम्कीका कारण उनी जनकपुर नै छाडेर पलायन हुनुपरेको छ । बिजय महतोका बाबुलाई पनि चन्द्रभूषणहरूले यसअघि दुःख दिएका थिए । अहिले पुनः महतोलाई धम्की दिएपछि उनी धनुषा नै छाडेर भारतमा लुकेर बस्न बाध्य भएका छन् । चन्द्रभूषणप्रसाद एक उदाहरण हुन्, बिहार बासुपट्टिका एक घरका ९ जनासम्मले नेपाली नागरिकता लिएका छन् । ( साँघु साप्ताहिक, जेठ १३)