प्रधानमन्त्रीको काम बजेट दिनेमात्रै हो,जलहरी प्रकरणमा मेरो सम्बन्ध : छैन् ओली

काठमाडौं । एमालेका अध्यक्ष केपी शर्मा ओलीले पशुपतिनाथ मन्दिरमा सुनको जलहरी प्रकरणको विषयमा आफ्नो कुनैपनि सम्बन्ध नभएको बताएका छन् ।

सञ्चारकर्मीहरुसंग कुरा गर्दै उनले प्रधानमन्त्रीको काम बजेट दिनेमात्रै भएको उल्लेख गरे ।

उनले भने, ‘मैले त पशुपति विकास कोषलाई पैसा दिनेमात्रै हो। अरू काम उनीहरूले कस्तो गरे, के गरे मसँग सम्बन्धित विषय होइन । खाएकै रहेछन् भने पनि मसँग सम्बन्धित विषय होइन ।”उनले थपे, शिलान्यास, उद्घाटन गर्नेको नाम लेख्ने चलन सबैतिर भएकाले जलहरीमा आफ्नो नाम लेखिनु स्वाभाविकै हो ।

पहिले ९९.९९ प्रतिशत सांसदको समर्थनमा बजेट पारित हुने गरेकोमा अहिले ५३ प्रतिशतले मात्रै पारित भएको भन्दै ओलीले वर्तमान सरकारले संसदमा आफ्नो मत गुमाउँदै गएको बताए । तर यो सरकारलाई विस्थापन गर्ने प्रयासमा नलागेको उनले दाबी गरे ।