मर्स्याङ्दी नदीमा मालबहावक ट्रक खस्यो

श्रावण ४, २०७४- मर्स्याङ्दी गाउँपालिका ४, ताघ्रिङको स्याँगेस्थित मर्स्याङ्दी नदीमा मालबहावक ट्रक खस्दा एकजना बेपत्ता भएका छन् । दुईजनाको सकुशल उद्धार गरिएको छ ।
काठमाडौंबाट हिमाली जिल्ला मनाङ जाँदै गरेको बा २ ख ९६०६ नं. को टाटा मिनी ट्रक बुधबार बिहान साँढे ९ बजेतिर मर्स्याङ्दीमा खसेको हो ।

प्रहरी चौकी बाहुनडाँडाका असई जीतबहादुर थापाले घटनाबारे बिहान साँढे ९ बजेतिर जानकारी आएको र प्रहरी टोली घटनास्थल जाँदै गरेको बताए । घटनास्थल प्रहरी चौकीबाट ३ घण्टा टाढा पर्छ भने लमजुङ बेंसीसहरबाट करिब २४ किलोमिटर उत्तरतर्फ पर्छ । स्थानीयका अनुसार स्याँगे बजार कटेपछि पुरानो स्याँगे नपुग्दै घुम्तीबाट ट्रक मर्स्याङ्दीमा खसेको हो । ट्रक करिब ७० मिटर तल खसेको स्थानीयको भनाइ छ ।

मर्स्याङ्दी गाउँपालिका ४ का वडाध्यक्ष सुमन गुरुङले २ जनालाई घाइते अवस्थामा उद्धार गरिएको र उपचारका लागि एम्बुलेन्समार्फत बेंसीसहरतर्फ पठाएको बताए । स्थानीयका अनुसार चालक धादिङका अनिल श्रेष्ठ र जिल्ला स्वास्थ्य कार्यालय मनाङका लेखा अधिकृत सुवास अधिकारीलाई उपचारको लागि बेंसीसहर पठाइएको हो । ट्रकका सहयोगी राजन भन्ने युवक हराइरहेका छन् । स्थानीय पदम गुरुङले हराइरहेकाको खोजी जारी रहेको र नदीको बहाव ठूलो रहेकाले समस्या परेको बताए । ‘ट्रक नदीमै पुगेर डुबिसकेकाले बेपत्ता भएको हुनसक्छ । अन्यत्र भए सम्पर्कमा आउने थियो, सम्पर्कमा आएको छैन । हामी खोजी गरिरहेका छौं’ उनले भने । घाइतेले पहिलोपटक मनाङमा उक्त ट्रक आएको र ब्रेक फेल भएर दुर्घटना भएको बताएका स्थानीयले बताएका छन् । स्थानीयका अनुसार उनीहरु मंगलबार बेंसीसहर बस्न आएको र बुधबार बिहान बेंसीसहरबाट मनाङतर्फ जाँदै थिए ।