चार दिनपछि खुल्यो बेनी–बाबियाचौर सडक: पश्चिमी म्याग्दीको जनजीवन सहज
सारांश
- लगातारको वर्षा र पहिरोका कारण चार दिनदेखि अवरुद्ध बनेको म्याग्दीको बेनी–बाबियाचौर सडकखण्ड मर्मतपश्चात् मंगलबार साँझदेखि पुनः सञ्चालनमा आएको छ।
- म्याग्दीको पश्चिमी क्षेत्रलाई जिल्ला सदरमुकाम बेनी बजारसँग जोड्ने पूर्वाधार विकास कार्यालयले उपकरण परिचालन गरी बेनीदेखि पानाबगरसम्मको १६ किलोमिटर सडक खुलाएसँगै यातायात आवागमन सहज बनेको हो।
- असोज १० गतेदेखि सडक ठप्प हुँदा स्थानीयवासीको दैनिक जनजीवन निकै प्रभावित बन्दै आएको थियो।
लगातारको वर्षा र पहिरोका कारण चार दिनदेखि अवरुद्ध बनेको म्याग्दीको बेनी–बाबियाचौर सडकखण्ड मर्मतपश्चात् मंगलबार साँझदेखि पुनः सञ्चालनमा आएको छ। म्याग्दीको पश्चिमी क्षेत्रलाई जिल्ला सदरमुकाम बेनी बजारसँग जोड्ने पूर्वाधार विकास कार्यालयले उपकरण परिचालन गरी बेनीदेखि पानाबगरसम्मको १६ किलोमिटर सडक खुलाएसँगै यातायात आवागमन सहज बनेको हो। असोज १० गतेदेखि सडक ठप्प हुँदा स्थानीयवासीको दैनिक जनजीवन निकै प्रभावित बन्दै आएको थियो।
सडक खुलेपछि गण्डकी प्रदेश सरकार मातहत रहेका धवलागिरि, मालिका, मङ्गला र बागलुङको तमानखोला गाउँपालिकाका बासिन्दाले ठूलो राहत महसुस गरेका छन्। तीनै तहका सरकार र विपद् व्यवस्थापन समितिको समन्वयमा उपकरणहरू परिचालन गरी बाङ्गेपहिरोसम्मको २४ किलोमिटर दूरी मर्मत गरिएको हो। बाँकी जोखिमपूर्ण खण्ड पानाबगर–रणबाङ–दुखु–रातोढुङ्गा क्षेत्रमा पनि दुईतर्फी रूपमै मर्मत कार्यलाई तीव्रता दिइएको छ।
स्थानीय जनप्रतिनिधि तथा प्रदेशसभा सदस्य रेशमबहादुर जुग्जालीले पहिरोग्रस्त क्षेत्रमा उद्धार, राहत र सडक सञ्चालनलाई प्राथमिकतामा राखेर कार्य भइरहेको जानकारी दिएका छन्। म्याग्दीका प्रमुख जिल्ला अधिकारी गणेश गैरेका अनुसार तीनै तहका निकायको सहकार्यमा यातायात सेवालाई पूर्ण रूपमा सुचारु गराउन प्राविधिक टोली निरन्तर खटिरहेको छ।
अर्कातर्फ, कालीगण्डकीको कटानका कारण चीनसँगको मुख्य व्यापारिक नाका कोरला जोड्ने बेनी–जोमसोम सडक अवरुद्ध हुँदा मुस्ताङसँगको सम्पर्क भने अझै विच्छेद नै छ। सडक ठप्प भएपछि मुस्ताङबाट दसैँ-तिहारका लागि स्याउ र च्याङ्ग्रा बजार पठाउन तथा सोह्रश्राद्धका लागि कागबेनी जाने तीर्थयात्रीहरूलाई ठूलो सास्ती भएको छ।
पर्यटन तथा व्यापारको मुख्य सिजनमै उत्तरी नाका जोड्ने सडक अवरुद्ध भएपछि सङ्घीय सरकारले खटाएको प्राविधिक टोलीले मंगलबारदेखि सो क्षेत्रको स्थलगत निरीक्षण सुरु गरेको छ। क्षतिको अन्तिम विवरण सङ्कलन गरी बेनी–जोमसोम–कोरला सडक खण्डलाई पनि यथाशीघ्र सञ्चालनमा ल्याउन मर्मत कार्य अघि बढाइँदै छ।
कुल कमेन्ट:
0
Asmita Ramtel
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया