मुग्लिन-काठमाडौं सडकखण्डमा सुक्खा पहिरो, मुग्लिन–काठमाडौं सडकखण्ड दुईतर्फी अवरुद्ध

धादिङमा गएराति मुग्लिन–काठमाडौँ सडक खण्ड एकैपटक बन्द हुन पुगेको छ। बेनीघाट रोराङ गाउँपालिका–१० को जवाङ खोलामा आएको सुक्खा पहिरोले सडक अवरुद्ध बनाउँदा सवारी आवागमन पूर्ण रूपमा ठप्प भएको हो। राति ढुंगामाटो खसेपछि बाटो दुबै तर्फ बन्द हुँदा यात्रुहरू बीचमै अलपत्र परेका छन्।

सडक खुलाउनका लागि अहिले डोजर परिचालन गरिएको छ भने सुरक्षाकर्मी पनि उद्धार र व्यवस्थापनमा खटिएका छन्। स्थानीयले भने तत्कालीन असर झेल्नुपरेको भन्दै यातायात चाँडै सञ्चालनमा ल्याउन सम्बन्धित निकायलाई आग्रह गरेका छन्। लगातार पहिरोको जोखिमका कारण यो सडक खण्ड बारम्बार अबरुद्ध हुने समस्या देखिँदै आएको छ।

मुग्लिन–काठमाडौँ सडक राजमार्ग मुलुककै व्यस्त सवारीमार्गमध्ये एक भएकाले यहाँ अवरोध हुँदा यात्रु मात्र नभई दैनिक आपूर्ति प्रणालीमा समेत असर पर्ने अवस्था देखिन्छ। पहिरो पन्छ्याउने काम भइरहेको भए पनि सडक कहिले खुल्ने भन्ने निश्चित हुन सकेको छैन।