श्रम दिवसका दिन श्रममन्त्री विष्टले खाए ‘कसम’,

काठमाडौं, १८ वैशाख । श्रम तथा रोजगार मन्त्री गोकर्ण विष्टले श्रमिक र मजदुरसँग नीति तथा ऐनहरू आवश्यकताअनुसार परिमार्जन गरेर हक अधिकार दिलाउने प्रतिवद्धता व्यक्त गरेका छन् ।

नेपाली रेडियो नेटवर्कको बहस कार्यक्रममा मंगलबार कुरा गर्दै मन्त्री विष्टले श्रम ऐन, वैदेशिक रोजगार ऐन, सामाजिक सुरक्षा ऐन लगायतका ऐनलाई समय सन्दर्भअनुसार सामुहिक बनाउँदै लैजाने बताए ।

श्रमप्रति सम्मान जगाएर नेपालको समृद्धिका लागि जनशक्ति प्रयोग गर्ने कुरामा आफू प्रतिवद्ध रहेको बताउदै मन्त्री विष्टले संविधानले दिएको श्रमिक वा मजदुरको अधिकार स्थापित गराउने दाबी गरे ।

श्रमिकहरूको समस्याको समाधान खोज्ने कुरामा सरकार गम्भीर भएर लागेको उनको भनाई छ । मन्त्री विष्टले वैदेशिक रोजगारीमा हुने अनियमितता र ठगीलाई कुनै पनि हालतमा रोक्ने बताए । ‘वैदेशिक रोजगार व्यवसायीहरूलाई ठगी गरे भने उन्मुक्ति दिइनेछैन’, उनले भने, ‘मे दिवसका अवसरमा मैले बोलेको छु । सबै समस्या हटाउन पहल गर्छु ।’

सन् १८८९ मे १ मा अमेरिकाको शिकागो शहरका मजदुरहरुले आन्दोलन गरेर ८ घण्टे कार्यदिन लागू भएपछि यसैको उपलक्ष्यमा सन् १८९० देखि संसारभरिका मजदुरले मे १ को दिनलाई अन्तरराष्ट्रिय मजदुर दिवसका रुपमा मनाउने प्रचलन सुरु भएको हो ।

शिकागो मजदुर आन्दोलनको उपलब्धीका रुपमा विश्वभरि ८ घण्टा ड्युटीलाई एक दिन मानेर गणना गर्ने प्रचलन रहेको छ ।

गत वर्षको तथ्यांकअनुसार नेपालमा निजी एवं सरकारी क्षेत्रमा कार्यरत मजदुर र कर्मचारीको संख्या १ करोड १८ लाखको हाराहारीमा छन् ।