सीएनएन । यदी विश्वविद्यालयले अनलाइन कक्षा मात्र सञ्चालन गर्ने निर्णय गरे अमेरिकामा पढ्न आएका अन्तर्राष्ट्रिय विद्यार्थीहरुले देश छाड्न पर्ने हुनसक्ने इमिग्रेसन एन्ड कस्टम्स इनफोर्समेन्ट (आईसीई) ले सोमबार बताएको छ ।
कोरोनाभाइरसको महामारीका कारण हार्भड र प्रिन्सटनजस्ता अमेरिकाका धेरै विश्वविद्यालयले क्याम्पसमा रहेका विद्यार्थीहरुलाई समेत कोर्सका केही अंश अनलाइन कक्षा मात्र दिने घोषणा गरिसकेको छ ।
यदी यो लागू भए अमेरिकामा हाल अध्ययन गरिरहेका १० लाखभन्दा बढी अन्तर्राष्ट्रिय विद्यार्थीहरु प्रभावित हुनेछन् । इन्सटिट्युट अफ इन्टरनेसनल एजुकेसनका अनुसार सन् २०१८–१९ मा १० लाखभन्दा बढी अन्तर्राष्ट्रिय विद्यार्थीहरु अध्ययन गरिरहेका थिए ।
यसमध्ये धेरै विद्यार्थी एसियाली मुलुकका रहेका छन् । सबैभन्दा धेरै चीनबाट ३ लाख ६९ हजार ५४८ र भारतबाट २ लाख २ हजार १४ रहेका छन् । पाँचौ स्थानमा क्यानाडाबाट २६ हजार १२२ र १० औँ स्थानमा मेक्सिकोबाट १५ हजार २२९ रहेका छन् ।
आईसीईले अनलाइन कक्षा सञ्चालन गर्ने निर्णय गरेका विश्वविद्यालयमा पढ्न आउन लागेका विद्यार्थीहरुलाई भिसा पनि जारी नगर्ने बताएको छ । र, त्यस्ता विश्वविद्यालयमा पढ्न आउने विद्यार्थीहरुलाई अमेरिकामा प्रवेश नदिने बताएको छ ।
अमेरिकी काउन्सील अफ एजुकेसनका उपाध्यक्ष ब्राड फ्रान्सवर्थले यो घोषणाले सबैलाई आश्चर्यचकित बनाएको बताएका छन् । यसले थप अन्यौलता र अनिश्चितता ल्याउने उनको प्रतिक्रिया छ ।
