मोरङमा भरुवा बन्दुक बनाउने आरनसहित एक जना पक्राउ
सारांश
- मोरङको लेटाङमा अवैध रूपमा घरेलु हातहतियार निर्माण तथा बिक्री-वितरणमा संलग्न रहेको आरोपमा प्रहरीले एक जनालाई हातहतियार र निर्माणका औजारसहित नियन्त्रणमा लिएको छ।
- गोप्य सूचनाका आधारमा खटिएको इलाका प्रहरी कार्यालय लेटाङको टोलीले लेटाङ नगरपालिका–७ वाराङ्गी कोलाघारीका ४५ वर्षीय पूर्ण लावती लिम्बूलाई गिरफ्तार गरेको हो।
- बुधबार बिहान करिब ९ः५५ बजे प्रहरी टोलीले कानुनबमोजिम लिम्बूको घरमा छापा मारी खानतलासी गर्दा घरभित्र लुकाएर राखिएका अवैध हातहतियार तथा औजारहरू फेला पारेको थियो।
मोरङको लेटाङमा अवैध रूपमा घरेलु हातहतियार निर्माण तथा बिक्री-वितरणमा संलग्न रहेको आरोपमा प्रहरीले एक जनालाई हातहतियार र निर्माणका औजारसहित नियन्त्रणमा लिएको छ। गोप्य सूचनाका आधारमा खटिएको इलाका प्रहरी कार्यालय लेटाङको टोलीले लेटाङ नगरपालिका–७ वाराङ्गी कोलाघारीका ४५ वर्षीय पूर्ण लावती लिम्बूलाई गिरफ्तार गरेको हो।
बुधबार बिहान करिब ९ः५५ बजे प्रहरी टोलीले कानुनबमोजिम लिम्बूको घरमा छापा मारी खानतलासी गर्दा घरभित्र लुकाएर राखिएका अवैध हातहतियार तथा औजारहरू फेला पारेको थियो। प्रहरीले खानतलासीका क्रममा तयारी अवस्थाको एक थान भरुवा बन्दुक, एक थान दबासवाला बन्दुक र हातहतियार बनाउन प्रयोग गरिने विभिन्न पार्टपुर्जाहरू बरामद गरेको छ।
यसैगरी, लिम्बूको घरबाट घरेलु हातहतियार निर्माणका लागि प्रयोग गरिने आरनसमेत बरामद गरिएको जिल्ला प्रहरी कार्यालय मोरङले जनाएको छ। प्रहरीको प्रारम्भिक अनुसन्धान अनुसार लिम्बूले आफ्नै घरमा आरन सञ्चालन गरी भरुवा बन्दुक बनाउने र स्थानीय क्षेत्रमा बिक्री-वितरण गर्ने कार्य गर्दै आएका थिए।
अवैध हातहतियार र निर्माण सामग्रीसहित नियन्त्रणमा लिइएका लिम्बूलाई थप कारबाहीका लागि इलाका प्रहरी कार्यालय लेटाङमा राखिएको छ। शान्ति सुरक्षामा खलल पुर्याउने यस्ता गैरकानुनी कार्य नियन्त्रण गर्न प्रहरीले सूक्ष्म अनुसन्धान अघि बढाएको छ।
शान्ति सुरक्षा सुदृढ बनाउने अभियानअन्तर्गत मोरङ प्रहरीले अवैध हातहतियारको कारोबार र निर्माणविरुद्ध कडा कदम चालिरहेको छ। पक्राउ परेका व्यक्तिमाथि हातहतियार तथा खरखजना सम्बन्धी कसुरमा मुद्दा दर्ता गरी थप अनुसन्धान प्रक्रिया अगाडि बढाइएको प्रहरीले जनाएको छ।
कुल कमेन्ट:
0
Asmita Ramtel
लेखकबाट थप
यो खबर पढेर तपाईंलाई कस्तो महसुस भयो ?
प्रतिक्रिया