राजनीतिक प्रतिशोध साध्न म विरुद्ध नौटंकी हुँदैछ: नवराज सिलवाल

काठमाडौं, माघ ५ । पूर्वडिआईजी तथा नवनिर्वाचित सांसद नवराज सिलवालले राजनीतिक प्रतिशोध साँध्न आफूविरुद्व शक्तिको गलत प्रयोग गरिएको आरोप लगाएका छन् । शुक्रबार बिहान सामाजिक सञ्जाल ट्विटरमार्फत सिलवालले विपक्षीलाई प्रहार गर्न सरकारले नौटंकी प्रदर्शन गरेको आरोप लगाएका हुन् ।

उनले ट्विटमा लेखेका छन्, ‘म जनताको प्रतिनिधि हुँ र कानूनको परिपालक एक जिम्मेवार नागरिक पनि हुँ । समय सकिन लाग्यो भन्ने हतारोमा राजनीतिक प्रतिशोध साध्न शक्तिको गलत प्रयोग गरी आफ्नो विपक्षिलाई प्रहार गर्ने जुन नौटंकि प्रदर्शन हुँदैछ, सत्यको जगमा त्यसको डटेर सामना हुनेछ ।’

म जनताको प्रतिनिधि हुँ र कानूनको परिपालक एक ज़िम्मेवार नागरिक पनि हुँ । समय सकिन लाग्यो भन्ने हतारोमा राजनीतिक प्रतिशोध साध्न शक्तिको ग़लत प्रयोग गरी आफ्नो विपक्षिलाई प्रहार गर्ने जुन नौटंकि प्रदर्शन हुँदैछ, सत्यको जगमा त्यसको डटेर सामना हुनेछ l

— Nawa Raj Silwal (@Nawasilwal) January 19, 2018

सिलवाल प्रतिनिधिसभा सदस्यमा नेकपा एमालेबाट ललितपुर क्षेत्र नम्बर १ बाट निर्वाचित सांसद हुन् । प्रहरीले देशव्यापी पक्राउ पूर्जी जारी गरेपछि सिलवाल देशबाहिर रहेको शंका गरिएको छ ।

आइजी नियुक्ति मुद्दामा अदालतमा कीर्ते कागजात प्रस्तुत गरेको आरोपमा अहिले प्रहरीले सिलवाललाई पक्रन सातै प्रदेशमा सर्कुलर जारी गरेको छ ।