देउवा सरकारको निर्णयः पत्नी आरजु र पुत्र जयबीरसिंहलाई समेत अंगरक्षक ,राष्ट्रिय धुकुटिको दोहन !

काठमाण्डौं, ९ साउन, गोबिन्द केसीको अनसनको त्यान्द्रो समाएर सरकार अधिनायकबाद भएको आरोपमा आन्दोलनमा उत्रेको कांग्रेस र त्यसका सभापति शेरबहादुर देउवा सरकार छोड्ने बेलामा तानाशाह जसरी आफ्नो परिवारका लागि राज्यकोषको चरम दुरुपयोग गरेको प्रमाण फेला परेको छ । आज प्रकाशित जनआस्था साप्ताहिकले देउवाले गरेको राज्यकोषको चरम दोहनको सप्रमाण समाचार प्रकाशित गर्दै लेखेको छ, आफ्नै पत्नीलाई समेत अंगरक्षक । समाचारमा उल्लेख भएअनुसार, संसदमा बाम गठबन्धनले बहुमत दाबी गरेपछि राष्ट्रपतिले केपी ओलीलाई शपथ खुवाउनु ११ दिनअघि मात्रै देउवाले आफ्ना लागि ठूलो सुरक्षा डफ्फाको प्रबन्ध गराएका हुन् । लाजमर्दो कुरा त के छ भने उनी आफू त पूर्वप्रधानमन्त्रीका हैसियतले सुरक्षा सेवाबाट लाभान्वित हुन पाउने नै भए । तर, कुनै औपचारिक ओहोदाबिना, खतरा र सुरक्षित राख्नुपर्ने खास तार्किक कारण नै नभई पत्नी  र छोराका लागि समेत सुरक्षाकमी परिचालन गराएका छन् ।

गृहमन्त्रालयले २०७४ माघ २२ गते प्रधानमन्त्री तथा मन्त्रिपरिषद्को कार्यालयमा विशिष्ट व्यक्तिको सुरक्षा व्यबस्थापन सम्बन्धमा शीर्षक अन्तर्गत पठाएको प्रस्तावबाट आफ्ना लागि सुरक्षा व्यबस्था मिलाएका हुन् । सो निर्णयको पाँचौ नम्बरमा उल्लेख छ, सम्माननीय प्रधानमन्त्री शेरबहादुर देउवाज्यूको सुरक्षाका लागि वर्तमान कार्यकाल समाप्तिपश्चात् ४० जना(नेपाल प्रहरीबाट नायब उपरीक्षकको कमाण्डमा १५ जना र सशस्त्र प्रहरी बलबाट निरीक्षकसमेत २५ जना) को जनशक्ति सुरक्षाकर्मी उपलब्ध गराउने । साथै, सोही तैनाथी संख्याबाट उहाँकी धर्मपत्नी पूर्व सांसद डा. आरजु राणा र छोरा जयबीरसिंह देउवालाई पनि व्यक्तिगत सुरक्षा उपलब्ध गराउने ।

ससँगै तीनै जनालाई प्रहरीबाट अलग अलग सवारीचालक लाने कामसमेत भएको छ । नेपालको इतिहासमा आजका मितिसम्म यसरी कसैले पनि पद र शक्तिको दुरुपयोगमार्फत् पत्नी र पुत्रको निम्तिसमेत हतियारधारी सरकारी कर्मचारी खटाउने निर्णय गरेको पाइन्न । यस मामिलामा व्यक्तिगत स्वार्थका निम्ति दरबारलाई दुईचोटी प्रजातन्त्र बुझाएको भनी आरोपित देउवा दुर्लभ अपवाद मानिन्छन् । मन्त्रिपरिषदको त्यै बैठकबाट तत्कालीन अर्थमन्त्री ज्ञानेन्द्रबहादुर कार्कीलाई प्रहरीको एक जना असई दर्जाका अधिकृतसहित तीन प्रहरीको सुरक्षा अनुमोदित भएको थियो ।

सबाहे देउवा सरकारले म्यानपावर व्यबसायी तथा तत्कालीन श्रममन्त्री टेकबहादुर गुरुंग, दांगका नेता दीपक गिरी, तनहुँका सांसद तथा तत्कालीन वनमन्त्री शंकर भण्डारी, पतञ्जली नेपालका प्रतिनिधि शालिग्राम सिंह र केही वकिललाई पनि बिनातर्क सुरक्षाकर्मी उपलब्ध गराएको छ ।