अटो उद्योग सङ्कटले जर्मनीका युवा इन्जिनियरको रोजगारी प्रभावित

विश्वप्रसिद्ध औद्योगिक साख बोकेको जर्मनीको अटोमोटिभ क्षेत्रमा चिनियाँ प्रतिस्पर्धा र आर्थिक सुस्तताका कारण आएको मन्दीले त्यहाँका दक्ष इन्जिनियरहरूलाई गम्भीर रोजगारीको संकटमा धकेलेको छ। कुनै समय डिग्री नसकिँदै आकर्षक जागिर पाउने अपेक्षा गरिने यस क्षेत्रमा हाल ‘कम्प्युटर भिजन’ प्रविधिमा दक्ष म्याक्स पेलजस्ता युवा इन्जिनियरहरू वर्षौंदेखि दर्जनौँ आवेदन दिँदा पनि एउटा स्थायी अवसर पाउन नसकेर भौंतारिनु परिरहेको छ।

चीनका बीवाइडी र एक्सपेङजस्ता कार निर्माता कम्पनीले विश्व बजारमा जर्मन उद्योगको हिस्सा खोसेपछि यो संकट गहिरिएको हो। कोलोनस्थित आइडब्ल्यू आर्थिक संस्थानका अनुसार विगत एक दशकमा जर्मनीको कार उत्पादन वार्षिक ६० लाखबाट घटेर करिब ४० लाखमा सीमित भएको छ। फलतः फक्सवागन जस्ता प्रतिष्ठित कम्पनीहरूले हालै एक लाखसम्म रोजगारी कटौती गर्ने योजना सार्वजनिक गरेपछि मजदुरहरू जर्मनीभर विरोध प्रदर्शनमा उत्रिएका छन्।

सङ्घीय रोजगार एजेन्सीका अनुसार पछिल्लो पाँच वर्षमा जर्मनीको अटोमोटिभ क्षेत्रमा रोजगारी आठ प्रतिशतले घटेको छ भने योग्य इन्जिनियरको बेरोजगारी दर विगत दुई वर्षमा ५० प्रतिशतले बढेर ३.८ प्रतिशत पुगेको छ। यस आर्थिक गिरावट र कठोर पुनःसंरचनाका कारण प्रतिष्ठित आरडब्ल्यूटीएच आचेन विश्वविद्यालयका उत्कृष्ट विद्यार्थीहरू समेत ३०-४० वटा आवेदन दिँदा पनि प्रतिक्रिया नपाएर निराश बन्ने गरेका छन्।

यो सङ्कटले स्थापित ब्रान्डमा मात्रै भर नपरी प्रविधिको बजारमा नयाँ विकल्प खोज्नुपर्ने बाध्यता सिर्जना गरेको छ। महिनौँको प्रयासपछि सफ्टवेयर परामर्शदाताको रूपमा काम सुरु गरेका इलेक्ट्रिकल इन्जिनियर लुका लिन्सेन अब केवल राम्रो आम्दानी वा जागिरको सुनिश्चितताका लागि मात्र नभई प्रविधिप्रतिको वास्तविक लगावका कारण मात्र इन्जिनियरिङ क्षेत्र रोज्नुपर्ने सुझाव दिन्छन्।