राष्ट्रिय एकता र शान्तिको कामनासहित बौद्ध समुदायद्वारा विशेष प्रार्थना सभा

नेपालको बहुसांस्कृतिक पहिचान र परम्परागत धार्मिक सहिष्णुतामाथि आँच आउन नदिन बौद्ध समुदायले आध्यात्मिक पहल सुरु गरेको छ। देशमा दिगो शान्ति, राष्ट्रिय एकता र आपसी भाइचारा कायम राख्ने उद्देश्यले नेपाल बौद्ध महासंघको अगुवाइमा काठमाडौँको ऐतिहासिक बौद्ध महाचैत्य परिसरमा आइतबार विशेष शान्ति प्रार्थना सभा सम्पन्न भएको छ। पूर्वी तराईमा विकसित पछिल्ला  घटनाक्रमका बीच सद्भावको सन्देश फैलाउन यो कदम चालिएको हो।

बौद्ध घ्याङ गुठी गोन्पामा आयोजित उक्त पवित्र अनुष्ठानमा विभिन्न गोन्पाका आदरणीय धर्मगुरु, खेन्पो, लोपोन तथा लामाहरूको गरिमामय उपस्थिति रहेको थियो। महासंघले सुनसरी र सिरहा लगायतका जिल्लामा भएका दुःखद हिंसात्मक घटनाप्रति गहिरो दुःख व्यक्त गर्दै सामाजिक सद्भाव जोगाउन आह्वान गरेको छ।

पछिल्लो समय तराई क्षेत्रमा देखिएको सामाजिक अशान्तिले वर्षौँदेखिको आपसी भाइचारालाई भत्काउन सक्ने खतरालाई मध्यनजर गर्दै धर्मगुरुहरूले चिन्ता व्यक्त गरेका छन्। कार्यक्रममा हिंसामा ज्यान गुमाउने नागरिकप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरिएको थियो। महासंघले विविधतायुक्त नेपाली समाजमा शान्ति र अमनचयन कायम राख्नु नै अहिलेको प्रमुख राष्ट्रिय आवश्यकता भएको स्पष्ट पारेको छ।

बौद्ध समुदायले देशका सम्पूर्ण राजनीतिक दल, नागरिक समाज, बुद्धिजीवी र आम सरोकारवालाहरूलाई संवेदनशीलता बुझेर संयमता अपनाउन अपिल गरेको छ। सबै पक्ष जिम्मेवार नभएसम्म दिगो शान्ति सम्भव नहुने ठहर गर्दै महासंघले मुलुकभरका गोन्पा, विद्यालय र बौद्ध संघसंस्थाहरूलाई आ-आफ्नो क्षेत्रबाट अशान्तिविरुद्ध प्रार्थना अभियान चलाउन निर्देशन दिएको छ।