पहिरो पन्छाएपछि मुग्लिन–नारायणगढ सडक दुईतर्फी सञ्चालनमा, अविरल वर्षाका कारण जोखिम भने कायमै

मुग्लिन–नारायणगढ सडकखण्डअन्तर्गत इच्छाकामना गाउँपालिकामा पर्ने नाम्सी पुल नजिकै खसेको पहिरो पन्छाएर यातायात सेवा पुनः दुईतर्फी सञ्चालनमा ल्याइएको छ। सडक डिभिजन कार्यालय भरतपुरले सडक डिभिजन कार्यालयको सक्रियतामा सुरक्षा उपकरण र जनशक्तिको द्रुत परिचालनमार्फत अवरुद्ध राजमार्गलाई सञ्चालनमा ल्याइएको हो। यो मार्ग हुँदै दैनिक यात्रा गर्ने यात्रुहरूको सुरक्षालाई ध्यानमा राख्दै सम्बन्धित निकायले सडक खुलाउन प्राथमिकता दिएको हो।

भर्खरै सो क्षेत्रमा माथिबाट लेदोसहितको सामान्य पहिरो खसेपछि केही समयका लागि यातायात सेवा एकतर्फी मात्र सञ्चालन हुन सकेको थियो। सडक डिभिजन भरतपुरका प्राविधिक तथा सुरक्षाकर्मीको सक्रियतामा राजमार्गको अवरोध हटाइए पनि सो क्षेत्रमा लगातार वर्षा भइरहेकाले पहिरोको थप जोखिम कायमै रहेको छ।सम्बन्धित निकायका अनुसार पहाडी खण्डको कमजोर भूबनोटका कारण वर्षाको समयमा जुनसुकै बेला माटो र ढुङ्गा खस्न सक्ने अनुमान छ।

वर्षातको समयमा हुनसक्ने सम्भावित दुर्घटनाबाट बच्न र लामो दूरीका सवारी साधनलाई संयमित भई चलाउन ट्राफिक प्रहरीले समेत आग्रह गरेको छ।