पत्रकारितालाई प्रविधिमैत्री बनाउन मधेस प्रदेश सरकारको पहल: आठै जिल्लाका पत्रकार महासङ्घलाई सञ्चार सामग्री हस्तान्तरण

मधेस प्रदेशमा प्रादेशिक तथा स्थानीय स्तरको सूचना प्रणालीलाई प्रविधिमैत्री र सुदृढ बनाउने उद्देश्यले नेपाल पत्रकार महासङ्घका जिल्ला शाखाहरूलाई आधुनिक सञ्चार उपकरण उपलब्ध गराइएको छ। प्रदेश सरकारले स्थानीय तहसम्म सञ्चार प्रवाहलाई थप व्यवस्थित र छरितो बनाउन आठवटै जिल्लाका महासङ्घ शाखाहरूलाई एक-एक थान कम्प्युटर, प्रिन्टर र प्रोजेक्टर वितरण गरेको हो।

गृह, सञ्चार तथा कानुन मन्त्रालयको आयोजना तथा मिडिया काउन्सिल मधेस प्रदेशको समन्वयमा जनकपुरमा आयोजित एक कार्यक्रमका बीच उक्त सामग्री हस्तान्तरण गरिएको हो। कार्यक्रममा गृह, सञ्चार तथा कानुनमन्त्री फकिरा महतोले आठवटै जिल्ला शाखाका अध्यक्षहरूलाई ती सञ्चार उपकरणहरू औपचारिक रूपमा हस्तान्तरण गर्नुभएको हो।

पत्रकारिता क्षेत्रलाई आधुनिक प्रविधिसँग जोड्दै थप व्यावसायिक र सक्षम बनाउने लक्ष्यका साथ सरकारले यो सहयोग अघि बढाएको हो। कार्यक्रममा मन्त्री महतोले लोकतन्त्रको सुदृढीकरणका लागि आमसञ्चार क्षेत्रको भूमिका महत्त्वपूर्ण हुने बताउँदै राज्य र नागरिकबीचको सम्बन्धलाई थप प्रगाढ बनाउन प्रविधिमैत्री पत्रकारिता आवश्यक रहेको धारणा राख्नुभयो।

हस्तान्तरण गरिएका यी उपकरणले जिल्ला स्तरमा कार्यरत पत्रकारहरूलाई समाचार सङ्कलन, सम्पादन र सूचना व्यवस्थापनमा ठूलो सहयोग पुग्ने अपेक्षा गरिएको छ। प्रादेशिक गतिविधि, नागरिकका समस्या र राज्यका उपलब्धिलाई निष्पक्ष रूपमा जनतासमक्ष पुर्‍याउन यस प्राविधिक सहयोगले संस्थागत क्षमता अभिवृद्धि गर्नेछ।

कार्यक्रममा मन्त्रालयका सचिव डा. विन्देश्वरप्रसाद लेखक, मिडिया काउन्सिलका कार्यवाहक अध्यक्ष बन्दना झा तथा महासङ्घका प्रदेश महासचिव शैलेन्द्र महतोको उपस्थिति रहेको थियो।