आर्थिक स्थायित्वका लागि चेम्बर र उद्योग परिसङ्घले सहकार्य गर्ने

काठमाडौँ । निजी क्षेत्रका व्यवसायीको दुई छाता सङ्गठन नेपाल चेम्बर अफ कमर्श र नेपाल उद्योग परिसङ्घले आर्थिक स्थायित्वका लागि सहकार्य गर्ने भएका छन् ।

नेपाल उद्योग परिसङ्घको नवनिर्वाचित पदाधिकारी एवं कार्यसमितिलाई बधाई तथा शुभकामना दिन आज चेम्बर भवनमा आयोजित कार्यक्रममा दुई संस्थाले बजेट र मौद्रिक नीतिको प्रभावकारी समन्वयमार्फत आर्थिक स्थायित्व र विकासका लागि सहकार्य गर्ने भएको जानकारी दिएका हुन् ।

कार्यक्रममा चेम्बरका अध्यक्ष राजेन्द्र मल्लले आगामी वर्षको बजेट र मौद्रिक नीतिको प्रभावकारी समन्वयनमार्फत आर्थिक स्थायित्व दिनका लागि निजी क्षेत्रका संस्थाले सहकार्य गर्नुपर्ने बताए । “मुलुकको अर्थतन्त्रलाई उकास्न एवं निजी क्षेत्रको मागलाई सम्बोधन गर्न पनि हामीले सहकार्य गर्न जरुरी छ”, उनले भने ।

अध्यक्ष मल्लले उच्च ब्याजदरका कारण लगानीको वातावरण बन्न नसक्दा पछिल्लो समय समग्र निजी क्षेत्रको मनोबल खस्किएको बताए । मौद्रिक नीतिमार्फत वित्तीय स्थायित्व कायम गर्न एवं ब्याजदर नियन्त्रणका लागि सरोकारवाला सरकारी निकायलाई एकै स्वरमा झक्झक्याउनुपर्ने अध्यक्ष मल्लको भनाइ थियो ।

परिसङ्घका अध्यक्ष राजेशकुमार अग्रवालले मौद्रिक नीतिको प्रभावकारी कार्यान्वयनका लागि निजी क्षेत्रबीच सहकार्य हुनुपर्ने बताए । आर्थिक विकास र समृद्धि निजी क्षेत्रको चाहना भएकाले निजी क्षेत्रको मागलाई सम्बोधन गर्नका लागि सरकारसँग नियमित छलफल गर्ने वातावरण सिर्जना गर्नुपर्ने उनले उल्लेख गरे ।

उधारो कारोबारलाई निरुत्साहित गर्न अभियान चलाउने सम्बन्धमा पनि चेम्बर र परिसङ्घबीच सहकार्य गर्ने समझदारी बनेको छ । चेम्बर, परिसङ्घ र उद्योग वाणिज्य महासङ्घले आगामी वर्षको मौद्रिक नीतिका लागि बिहीबार संयुक्त सुझावसमेत पेश गर्दैछन् ।