गृहमन्त्रालयले भन्यो ‘भारतीय मालवाहक गाडीलाई जहाँसुकै चेकजाँच गर’
सारांश
- भारतबाट भित्रिने मालवाहक गाडीमा शंका लागे प्रहरीले जुनसुकै समय र स्थानमा चेकजाँच गर्न सक्ने गृहमन्त्रालयले जनाएको छ ।
- एक महिना पहिले गृहमन्त्रालयले २२ जिल्ला प्रशासनलाई परिपत्र गर्दै प्रहरीलाई अनावश्यक चेकजाँच नगर्न निर्देशन गरेको थियो ।
- तर गृह उक्त निर्देशनको सर्वत्र विरोध र आलोचना भएको थियो ।
भारतबाट भित्रिने मालवाहक गाडीमा शंका लागे प्रहरीले जुनसुकै समय र स्थानमा चेकजाँच गर्न सक्ने गृहमन्त्रालयले जनाएको छ । एक महिना पहिले गृहमन्त्रालयले २२ जिल्ला प्रशासनलाई परिपत्र गर्दै प्रहरीलाई अनावश्यक चेकजाँच नगर्न निर्देशन गरेको थियो । तर गृह उक्त निर्देशनको सर्वत्र विरोध र आलोचना भएको थियो । विरोध र आलोचना बढ्द गएपछि गृहले आफ्नो पूर्व निर्देशनलाई सच्चाउँदै त्यसको बचाउमा पछिल्लो विज्ञप्ति जारी गरेको हो ।
यसअघि भारतबाट भित्रिने मालवाहक साधनलाई अनावश्यक दुःख नदिन भन्दै परिपत्र गरेको गृह मन्त्रालयले अहिले नेपाल प्रहरी, सशस्त्र प्रहरी र सम्बद्ध सुरक्षा निकायले शंका लागेमा जहाँ र जुनसुकै समयमा चेकजाँच गर्नसक्ने जनाएको हो ।
गृह मन्त्रालयका प्रवक्ता रामकृष्ण सुवेदीले भनेका छन्, ‘कुनै व्यवसायप्रति आग्रह र पूर्वाग्रह राखी कसैप्रति लक्षित भई परिपत्र गरिएको हैन । उद्योगमैत्री वातावरण गर्न प्रशासनलाई परिपत्र गरिएको हो ।’
उक्त परिपत्र नेपाल प्रवेश गरिसकेपछि सडकमा हुने गरेको दुःख हैरानीका सम्बन्धमा आएका गुनासा सम्बोधन गर्ने प्रयोजनका लागि मात्रै गरिएको गृहको पछिल्लो दाबी छ । यसअघि जेठ २ गते गृह मन्त्रालयका शाखा अधिकृत दीपक पौडलले हस्ताक्षर गरेको परिपत्रमा बाटामा ट्राफिक प्रहरीले दुःख दिएको भन्दै चेकजाँच नगर्न निर्देशन दिइएको थियो ।
बाटोमा ट्राफिक प्रहरीले ओभरलोड भनेर ट्रक र ट्रेलर समाती दुःख दिने, जरिवाना तिराउने, २–३ दिनसम्म होल्ड राख्ने गरेको उद्योगीको गुनासोपछि यस्तो निर्देशन गर्नुपरेको गृह मन्त्रालयले जनाएको थियो ।
नियमन गर्ने छुट्टै निकाय भएकाले उनीहरूले आग्रह गरेमा शान्ति सुरक्षाको व्यवस्था गरे पनि अनावश्यक दुःख नदिन परिपत्रमा भनिएको थियो । नियामक निकायको समन्वय र अनुरोधबिना क्षेत्राधिकारविपरीत रोक्ने, हैरानी दिने कार्य नगर्न गृहमन्त्री रामबहादुर थापाको निर्णय भन्दै गरिएको आफ्नै परिपत्र विपरित गृहले सोमबार विज्ञप्ति जारी गरेको हो ।
प्रतिक्रिया