गोलनजोर–१ वडाध्यक्षमा माओवादी केन्द्रका सुनुवार विजयी

सिन्धुली, १ जेठ । गोलनजोर गाउँपालिका–१ डुँडभन्ज्याङका वडाध्यक्षमा नेकपा (माओवादी केन्द्र)का मीनबहादुर सुनुवार विजयी हुनुभएको छ ।
सुनुवारले पाँच सय २८ तथा उहाँका निकटतम प्रतिद्वन्द्वी नेपाली काँग्रेसका ठाकुरप्रसाद घिमिरेले चार सय ४६ र एमालेका कुञ्जरमणि बरालले एक सय ७२ मत प्राप्त गर्नुभएको थियो ।

गाउँपालिका अध्यक्षमा माओवादी केन्द्रका उम्मेदवार ज्वालाप्रसाद न्यौपानेले अग्रता कायमै राख्नुभएको छ । उहाँले छ सय ५९ मत प्राप्त गर्नुभएको छ । यस्तै काँग्रेसका पुष्पबहादुर कार्कीले तीन सय ४७ र एमालेका टीकाबहादुर देवकोटाले एक सय ३५ मत प्राप्त गर्नुभएको छ । गोलनजोरमा अहिलेसम्म एक हजार दुई सय ५० मत गणना भइसकेको छ ।

यस्तै गाउँपालिका उपाध्यक्षमा माओवादी केन्द्रकी सुष्पा भुजेलले छ सय २५, काँग्रेसका गङ्गा श्रेष्ठले तीन सय ६३ र एमालेकी धनकुमारी पुलामीले एक सय ५२ मत प्राप्त गर्नुभएको छ ।

यसैबीच सिन्धुलीको कमलामाई र दुधौली नगरपालिका तथा तीनपाटन, फिकल, सुनकोसी, घ्याङ्लेक, मरिण र हरिहरपुरगढी गाउँपालिकामा अहिले मतगणना सुरु भएको मुख्य निर्वाचन अधिकृत पर्शुराम भट्टराईले जानकारी दिनुभयो ।