जापानमा काम गर्न जाने ढोका खुल्यो, अप्रिलदेखि कामदार लैजान शुरु

काठमाडौं । लाखौं खर्च गरेर जापान जाँदै आएका नेपालीलाई खुसीको खबर आएको छ । जापानले अब सरकारसँगै सम्झौता गरेर नेपाली कामदारलाई कामका लागि जापान लैजाने भएको छ । यो प्रक्रिया कोरियाको जस्तै हुने अनुमान गरिएको छ ।

आगामी अप्रिल महिनादेखि कामदार लैजान शुरु हुने बताइएको छ । नर्सिङ केयर, रेस्टुरेन्टका लागि भाषा परीक्षा लिने योजना छ। अन्य कामदारलाई सन् २०२० को मार्चसम्म परीक्षा लिइने बताइएको छ।

जापान सरकारले मंगलवारदेखि लागु गरेको नयाँ नीतिमा विदेशी कामदारका लागि ढोका खुला गरेको छ । जापानको नयाँ नीतिअनुसार नेपाल कामदार लैजान उच्च प्राथमिकतामा पर्ने भएको छ ।

जापान सरकारले नेपालबाट जाने कामदारलाई नेपाली भाषामै परामर्श दिने नीति छ । जापानले फरकफरक १४ वटा क्षेत्रका लागि विदेशी कामदार लैजाने नीति ल्याएको हो। नर्सिङ केयर, रेस्टुरेन्ट, निर्माण क्षेत्र, औद्योगिक क्षेत्रमा विदेशी कामदार लैजाने भएको हो । जापानले विभिन्न देशबाट कम्तीमा साढे ३ लाख विदेशी कामदारलाई रोजगार भिषा दिएर जापान लैजाने बताएको छ। नेपाल लगायतका देशबाट त्यहाँ कामदार लगिनेछ ।

जापानले ११ वटा भाषा समावेश गरेको छ त्यसमध्ये नेपाली भाषा समेत राखिएको छ। जापानी, अंग्रेजी, थाई, चिनियाँ, कोरियन, स्पेनिस, भियतनामी, पोर्चुगिज, इण्डोनेसियन, फिलिपिनी भाषा समावेश गरिएको छ । विभिन्न ११ वटा भाषामा विदेशी कामदारलाई परामर्श, आवश्यक प्रशासनिक सहायता दिइने बताइएको छ ।

विदेशी कामदारलाई जापानी भाषा सिकाउन जापान सरकारले तालिम प्राप्त भाषा शिक्षकबाट कक्षा सञ्चालन गर्नेछ ।