न्यूजिल्याण्डलाई पराजित गर्दै पाकिस्तान बिजयी

काठमाडौं। इंग्ल्याण्ड वेल्समा जारी विश्व कप क्रिकेटमा लगातार ६ खेलमा अपराजित रहेको न्यूजिल्याण्ड बुधबार पाकिस्तानसँग ६ विकेटले पराजित भएको छ । यसअघि आफुले खेलेका ६ मध्ये पाँच खेलमा न्यूजिल्याण्ड विजयी भएको थियो भने एक खेल वर्षाका कारण रद्द भएको थियो।
बगिंघममा बुधबार सम्पन्न खेलमा न्यूजिल्याण्डले दिएको २३८ रनको लक्ष्य पाकिस्तानले ४ विकेट गुमाएर अन्तिम ओभरमा पुरा गरेको थियो । पाकिस्तानको जितमा बाबर आजम र ह्यारिसले उत्कृष्ट ब्याटिं गरे ।

बाबर आजमले पहिलो शतक बनाउनेक्रममा नटआउट १०१ रन बनाए । ह्यारिस सोहेलले ६८ रन बनाए । यो जितसँगै पाकिस्तानले सेमिफानल दौडमा आफुलाई जीवितै राखेको छ । जितपछि पाकिस्तानको ७ खेलबाट ७ अंक भएको छ । अब उसले बंगलादेश र अफगानिस्तानसँग खेल्न बाँकी छ । दुबै खेल जिते पनि पाकिस्तानलाई सेमिफाइनल पुग्न अन्य टिमको प्रदर्शनमाथि पनि भर पर्नुपर्नेछ ।

उता जारी प्रतियोगितामा पहिलो हार व्यहोरेको न्यूजिल्याण्डले बुधबार सेमिफाइनलमा स्थान पक्का गर्ने मौका गुमाएको छ । उसको हाल अंक तालिकामा ११ अंक छ । उसले अब इंग्ल्याण्ड र अष्ट्रेलियासँग खेल्न बाँकी छ । दुई मध्ये एक जितले पनि न्यूजिल्याण्ड सेमिफाइनल पुग्ने छ । यद्यपी दुबै खेल गुमाए पनि उसको सेमिफाइनल पुग्ने सम्भावना रहनेछ । किनकी उसको रनरेट पनि राम्रो छ र ११ अंक पनि छ ।

अष्ट्रेलिया सेमिफाइल पुगिसकेको छ । न्यूजिल्याण्ड, भारत, इंग्ल्याण्ड, बंगलादेश, पाकिस्तान र श्रीलंकाबीच बाँबी तीन स्थानका लागि प्रतिस्पर्धा छ ।